Der Spiegel jurnali «Real» hujumchisi Krishtianu Ronalduning aybini isbotlovchi hujjatlarni oshkor qildi.
Futbolchi 2010 yil yanvarida bir qizni zo‘rlaganlik ayblovidan qutilish uchun, unga 375 ming dollar tovon pulini to‘laganligi haqida avvalroq xabar berilgandi. Nemis nashri bu xabarning isboti sifatida, Ronaldu va uning maslahatchisi Osorio de Kastro o‘rtasidagi yozishmalarni chop etdi.
Quyida bu yozishmalardan parchalar keltirilmoqda.
Kastro: «O‘rtadagi odamning gapiga qaraganda, qiz dahshatga tushib, yig‘layotganmish. Ammo hozircha tovon puli haqida gap-so‘z yo‘q. Balki keyinroq paydo bo‘lib qolar»
Ronaldu: «Xo‘p»
Keyinchalik Kastro Ronalduga SMS jo‘natgan.
Kastro: «950 ming dollar»
Ronaldu: «Shu pulni so‘ramoqdami?»
Birozdan keyin Kastro: «Bu dastlabki talab edi. Endi 660 ming yevro so‘ramoqda. Biz rad javobini beramiz. Muzokara davom etmoqda»
Ronaldu: «Juda katta pulku?»
Kastro: «Ha, o‘ylashimcha bu pulni kamaytiramiz»
Ronaldu: «Bundan ham kamroq to‘lash kerak»
Keyinchalik Kastro Ronalduga muzokara natijalarini gapirib bergan: «Biz 260 ming yevroga kelishdik. Bundan tashqari, o‘rtada turgan odamga ham to‘lash kerak. Shuningdek, pulni o‘tkazib berish bilan shug‘ullanuvchi huquqshunoslarga ham pul berish kerak. Bilaman, bu oz pul emas. Ammo bu vaziyatdan chiqib ketish uchun eng yaxshi yo‘l – mana shu. Kelishuvga erishish ham oson bo‘lmadi».
Der Spiegel o‘z ma’lumotlariga Ronalduning imzosi tushirilgan hujjatlarni ilova qilgan. Biroq, shuni ta’kidlash lozimki, nemis nashri tovon pulini to‘langanligiga isbot keltirmoqda. Zo‘rlash borasida hech qanday dalil keltirilmagan.
