Krishtianu Ronaldu Chempionlar Ligasi tarixidagi eng yaxshi to‘purarga aylangach, endi uradigan har bir goli o‘z natijasini yanada yaxshilashga xizmat qilaveradi. Chempionlar Ligasi tarixida 100 lik dovonni ilk bosib o‘tgan Ronaldu shundan 85 tasini « Real » libosida, 15 golni esa « Manchester Yunayted » safida kiritgan.

Yetakchi futbolchi yirik bellashuvlarda o‘zini ko‘rsatadi, degan ibora futbolda tez-tez qo‘llanilib kelinadi. Buning tasdig‘ini Ronaldu misolida ko‘rishimiz mumkin. « Bavariya »ga qarshi kechgan bahsda « Real »ning 7-raqamli yulduzi o‘z dubli bilan jamoasining g‘alabasiga ulkan hissa qo‘shdi. « Santyago Bernabeu »da kechgan javob uchrashuvida ham portugaliyalik yulduz yuqori sport formasini namoyish eta olmagan bo‘lsada, xet-trik qayd etib, « Real »ni keyingi bosqichga olib chiqdi. 32 yoshli futbolchi o‘zining porloq davridagidek o‘ynay olmayotgan bo‘lsada, Manuel Noyer qo‘riqlayotgan « Bavariya » darvozasiga besh gol urdi !

« Bavariya »ga qarshi kechgan bahslar shuni ko‘rsatdiki, Ronaldu hal qiluvchi bahslarda o‘zini ko‘rsatishga doimo tayyor. Kurashuvchan, tug‘ma g‘olib kabi hislatlarga ega Ronaldu yuqori saviyali futbolchilar orasida hali ham o‘z o‘rnini yo‘qotgani yo‘q. Aynan « Oltin to‘p »ning amaldagi sohibi sa’y-harakatlari evaziga « Real » 3 iyun kuni bo‘lib o‘tadigan final uchrashuvida ishtirok etishi mumkin.