Криштиану Роналду Чемпионлар Лигаси тарихидаги энг яхши тўпурарга айлангач, энди урадиган ҳар бир голи ўз натижасини янада яхшилашга хизмат қилаверади. Чемпионлар Лигаси тарихида 100 лик довонни илк босиб ўтган Роналду шундан 85 тасини « Реал » либосида, 15 голни эса « Манчестер Юнайтед » сафида киритган.

Етакчи футболчи йирик беллашувларда ўзини кўрсатади, деган ибора футболда тез-тез қўлланилиб келинади. Бунинг тасдиғини Роналду мисолида кўришимиз мумкин. « Бавария »га қарши кечган баҳсда « Реал »нинг 7-рақамли юлдузи ўз дубли билан жамоасининг ғалабасига улкан ҳисса қўшди. « Сантяго Бернабеу »да кечган жавоб учрашувида ҳам португалиялик юлдуз юқори спорт формасини намойиш эта олмаган бўлсада, хет-трик қайд этиб, « Реал »ни кейинги босқичга олиб чиқди. 32 ёшли футболчи ўзининг порлоқ давридагидек ўйнай олмаётган бўлсада, Мануэл Нойер қўриқлаётган « Бавария » дарвозасига беш гол урди !

« Бавария »га қарши кечган баҳслар шуни кўрсатдики, Роналду ҳал қилувчи баҳсларда ўзини кўрсатишга доимо тайёр. Курашувчан, туғма ғолиб каби ҳислатларга эга Роналду юқори савияли футболчилар орасида ҳали ҳам ўз ўрнини йўқотгани йўқ. Айнан « Олтин тўп »нинг амалдаги соҳиби саъй-ҳаракатлари эвазига « Реал » 3 июн куни бўлиб ўтадиган финал учрашувида иштирок этиши мумкин.