«Real» futbolchilari Ispaniya chempionati va Chempionlar ligasida g‘olib chiqib, «oltin dubl»ga erishsa, katta miqdorda mukofot olishadi.

Florentino Peres jamoani rag‘batlantirish uchun 40 mln yevro mablag‘ ajratdi.

Joriy mavsumda «Real» Chempionlar ligasidagi ishtirokidan 30 mln yevro ishlab oldi. Agar yarimfinal to‘sig‘idan o‘tsa, bu summaning ustiga yana 7,5 mln yevro qo‘shiladi. Agar finalda yutqazsa 11 mln yevro, g‘olib chiqsa 15 mln yevro olishi mumkin. Telehuquqlarni sotishdan esa 20 mln yevro daromad oladi. Chempionlar ligasining g‘olibi umumiy hisobda 75 mln yevro ishlab olishi mumkin.

Agar «Real» har ikkala musobaqada g‘alaba qozonsa, mukofotlar quyidagicha taqsimlanadi: 36 mln yevro – asosiy jamoaning 24 futbolchisi orasida taqsimlanadi (har biriga 1,5 mln yevrodan). 2 mln yevro bosh murabbiy Zidanga tegadi. Qolgan 2 mln yevro murabbiylar shtabi a’zolari, Akademiyaning Chempionlar ligasi «B ro‘yxat»iga kirgan 11 futbolchisi, shuningdek asosiy jamoa bilan ishlaydigan boshqa xodimlarga taqsimlab beriladi.

Eslatib o‘tamiz, so‘nggi marta «Real» «oltin dubl»ga 59 yil oldin – 1957/58 mavsumda erishgandi.