«Borussiya» D bosh murabbiyi Tomas Tuxel va ijrochi direktor Xans-Yoaxim Vatske o‘rtasida janjal kelib chiqqan.

Ma’lumki, YECHL chorakfinalidan o‘rin olgan «Monako» klubiga qarshi o‘yindan oldin, «Borussiya» avtobusi oldida portlash yuz bergandi. Shundan so‘ng, UYEFA rahbariyati har ikkala jamoa vakillari bilan bog‘lanib, o‘yinni bir kun keyinga qoldirish haqida ularning roziligini olgan. «Borussiya» klubidan bu jarayonda Vatske va prezident Raynxard Rauball ishtirok etgan.

Bild xabariga ko‘ra, Tomas Tuxelga o‘yinning bir kun keyinga surilishi yoqmagan. Uning fikriga qaraganda, jamoaning ruhiy zo‘riqishdan tiklanib olishi uchun ko‘proq vaqt talab qilinar edi. Tuxel bu borada o‘zining fikri inobatga olinmaganidan darg‘azab bo‘lgan.

Tomas Tuxelning «Borussiya» bilan imzolagan shartnomasi 2018 yilgacha amal qiladi. Agar mojaro xayrli yakun topmasa, u jamoani tark etishi mumkin.

Eslatib o‘tamiz, ertasi kuni o‘tkazilgan o‘yinda «Borussiya» 2:3 hisobida yutqazgan edi.