9 may kuni Osiyo chempionlar ligasining "A" guruhi, 6-turidan o‘rin olgan "Al Ahli" (Dubay) - "Lokomotiv" (Toshkent) uchrashuvi bo‘lib o‘tadi.

Bugun o‘yindan oldingi matbuot anjumani tashkil etildi. Unda "Lokomotiv" bosh murabbiyi Andrey Miklyayev va himoyachi Muhammad Kone jurnalistlarning savollariga javob qaytarishdi.

«Ertaga ikkala jamoani ham qiziqarli va muhim bahs kutmoqda. Ertangi o‘yinda bizning guruhdan chiqishimiz hal bo‘ladi. Buning uchun esa faqat g‘alaba qozonishimiz shart. Raqibimiz "Al Ahli"ni durang ham qoniqtiradi. O‘ylaymanki, ertangi bellashuvda jamoamiz chiroyli o‘yin ko‘rsatgan holda g‘alaba qozonadi va guruhdan chiqadi.

Jamoamiz oldiga bu yil Chempionlar ligasida qo‘yilgan vazifa - avvalo guruhdan chiqish. Biz o‘tgan yil chorak finalga qadar yetib borgandik, o‘ylaymanki, guruhdan chiqsak bu yil ham shu natijani takrorlay olamiz. OCHLda har bir o‘yin bosim ostida o‘tadi va ertangi uchrashuv ham bundan xoli emas. Safimizda 20 nafar yaxshi futbolchi bor va ular bir-birlarining o‘rnini to‘ldira olishadi» - dedi Miklyayev.

«Bosh murabbiy aytib o‘tganidek, ertaga faqat g‘alabani ko‘zlab harakat qilamiz. Bizga bu o‘yindagi yutuq juda zarur. Buning uchun havoning juda issiqligi ham ta’sir o‘tkazmasligi kerak. "Al Ahli" kuchli jamoa, lekin ularni Toshkentda mag‘lub etganmiz. Ertaga ham shu natijani takrorlashga harakat qilamiz» - dedi Kone.