Bir necha yildan beri Turkiya chempionatida to‘p surib kelayotgan hamyurtimiz Asror G‘ofurov faoliyatini ushbu mamlakatning 4-divizioni klubi «Chorluspor-1947»da davom ettiryapti. Futbolchi bundan avval Turkiya quyi ligalarida o‘ynagan. Bir-necha kun oldin ushbu birinchilikda mavsum yakunlandi. Asror o‘ynagan jamoa 13ta klub qatnashgan ligada 45 ochko bilan 3-o‘rinni egalladi. Bu yil 70 yilligini nishonlayotgan «Chorluspor-1947» peshqadamdan 9 ochko kam jamg‘ardi. E’tiborlisi, G‘ofurov jamoasi liganing kichik oltin medallarini qo‘lga kiritgan «Velimeshespor» klubini har ikki davradagi o‘yinda ham mag‘lub etishning uddasidan chiqdi. Bu futbolchi faoliyatini «Paxtakor» akademiyasida boshlagan edi. Biz Toshkentga qaytib kelgan Asror G‘ofurovdan intervyu oldik.
- Asror, Turkiya chempionatining 4-ligasi yakunlandi. Ayting-chi, mavsum jamoangiz uchun qanday o‘tdi?
- Chempionatni 3-o‘rinda yakunladik. Umuman olganda, mavsum jamoamiz uchun yomon o‘tmadi. Faqat bizdan kuchsiz raqiblarga imkoniyatni boy berib qo‘yganimiz yoki o‘sha o‘yinlarda ochko yo‘qotganimiz yakunda qimmatga tushdi. Turnir jadvaliga e’tibor qaratsangiz, o‘tkazilgan 24ta o‘yinimizdan 9tasida durang natija qayd etganmiz. Uchta uchrashuvda mag‘lubiyatga uchradik. Liga chempioni bo‘lgan «Velimeshespor» klubi ikki bor yutqazdi. E’tiborlisi, ularga ikkala mag‘lubiyatni ham biz «taqdim etdik».
- Nechta jamoa uchinchi ligaga yo‘l oldi?
- Faqat chempionga bu imkoniyat taqdim etildi. Peshqadamdan 9 ochko ortda qolib ketdik. Ikkinchi o‘rindagi «Gebzespor» klubidan 3 ochko kam jamg‘ardik.
- Mavsum oldidan jamoa oldiga aniq vazifa qo‘yilganmidi?
- Albatta. Uchinchi ligaga chiqish ko‘zda tutilgandi. Klub rahbariyati mavsumlar oralig‘ida shunga yarasha transferlarni amalga oshirgandi. Misol uchun, o‘z vaqtida «Antalyaspor» klubida o‘ynagan Serj Pakome. Kot D~ivuarlik bu hujumchi o‘z gollari bilan jamoamizga yordam berdi. Bundan tashqari, tarkibimizda Turkiya superligasi hamda 1-ligasida tajriba to‘plagan futbolchilar ham bor edi.
- Klub rahbariyati natijani qanday qabul qildi?
- Albatta, barchamiz natijadan xafa bo‘ldik. Bunday yakun bo‘lishini kutmagandik. Yuqorida aytganimdek, bo‘lajak chempionlarni har ikkala o‘yinda ham mag‘lub etib, o‘zimiz 3-o‘rin bilan kifoyalandik. Bu haligacha alam qilyapti. Ochig‘i, bo‘lib o‘tgan voqeani hazm qila olmayapman. Shunga qaramay, muxlislar so‘nggi turgacha bizni qo‘llab-quvvatlab turishdi.
- Shaxsan o‘zingiz uchun chempionat qanday kechdi? O‘z o‘yiningizdan ko‘nglingiz to‘ldimi?
- To‘ldi, desam ham bo‘ladi. Sababi, barcha o‘yinlarda asosiy tarkibda maydonga tushdim va to‘liq 90 daqiqa o‘ynadim.
- Endigi rejalar qanday?
