Joriy mavsum boshida «Buxoro» safini to‘ldirgan Vladimir Bayenko qisqa muddat ichida yangi jamoasiga moslasha oldi. Yaqinda FootBoom portali ko‘hna shaharliklarning ukrainalik legionerini suhbatga tortib, uning O‘zbekistondagi faoliyati bilan qiziqish barobarida, boshqa mavzulardagi savollariga ham javob olishdi.
— «Buxoro» safiga qishda qo‘shilgandingiz. Hozirga kelib bir qator uchrashuvlarda maydonga tushdingiz. Ancha moslashib oldingizmi?
— Hammasi ko‘ngildagidek. Meni bu yerda iliq qabul qilib olishdi. Shu bois ham muammolar bo‘lmadi. Shart-sharoitlardan to‘la qoniqyapman. Murabbiyning talabi, mahalliy odatlar va o‘yin ritmini tezda tushunib oldim. To‘g‘risini aytsam, moslashishim o‘zim kutgandan ham tezroq amalga oshdi.
— Iqlim sharoiti qiyinchilik tug‘dirmayaptimi?
— Yo‘q. Kunlar endi isiy boshladi. Bunga qadar ob-havo xuddi Ukrainadagi kabi edi.
— O‘zbekiston va Ukraina futboli orasidagi tafovutni sezdingizmi?
— Ha, albatta. Birinchi farqi, bu yerda «Dinamo» va «Shaxtyor» kabi grandlar yo‘q. Shuning uchun natijalarni oldindan taxmin qilib bo‘lmaydi. Joriy mavsumdagi uchrashuvlar klublarning kuchlari deyarli teng ekanini ko‘rsatmoqda. Raqib qaysi jamoa bo‘lishidan qat’iy nazar, undan ochko olish mumkin. Har bir uchrashuv turnir jadvalidagi holatingizga jiddiy o‘zgartirish kiritishi tayin. Aytaylik, ikkinchi o‘rinda ketyapsiz. Qabul qilib olingan bittagina mag‘lubiyat klubingizni yetti yoki sakkizinchi o‘ringa tushirib yuborishi hech gap emas.
— O‘yinlar tezligi qanday?
— Bizning mamlakatdagi kabi tezkor, deya olmayman. Ammo aytaylik, Ukraina chempionatida «Stal»-«Zirka» uchrashuvida ham tezlik yuqori emas. Biroq «Shaxtyor»ning o‘yiniga qarab taqqoslaydigan bo‘lsak, ukrainlar bu borada ancha ustun. Umuman olganda esa, farq unchalik katta emas.
— Ukraina futbolidagi kabi qo‘polliklar O‘zbekistonda ham kuzatiladimi?
