«Kristal Pelas» bosh murabbiyi Sem Ellardays APL rahbariyatini keskin tanqid ostiga oldi.
Mutaxassis «MYU» klubiga qarshi yakshanba kuni o‘tkaziladigan so‘nggi tur o‘yinini shanba kuniga ko‘chirish lozim edi deb hisoblamoqda va bu borada «MYU» ustozi Joze Mourinyo bilan hamfikr ekanini bildirdi.
«MYU»ga qarshi o‘yinimizni shanba kuniga ko‘chirish lozim edi. Natijada «MYU» Yevropa ligasi finaliga yaxshiroq tayyorgarlik ko‘rgan bo‘lardi. Boshqa mamlakatlar o‘z klublariga yevrokuboklarda g‘alaba qozonish uchun yordam berishmoqda, faqat Angliya emas. Bu – sharmandalik.
Biz klublarimizning Yevropada g‘alaba qozonmayotganidan noliymiz. Ammo «MYU»ning taqvimiga nazar soling, ular mavsumdagi 64-o‘yinni o‘tkazmoqda. Bizga qarshi o‘yinning hech qanday ahamiyati yo‘q va uni bemalol ko‘chirish mumkin edi. Afsuski klublar Premyer-ligadan hech qanday yordam olmayapti» - dedi Ellardays Manchester Evening News xabarida.
Avvalroq, Joze Mourinyo «Kristal Pelas»ga qarshi o‘yinda yoshlar tarkibini tushirishini aytgandi.
