Futzal bo‘yicha yoshlar (U20) o‘rtasidagi Osiyo chempionatida chorak final o‘yinlari bo‘lib o‘tdi. O‘zbekiston terma jamoasi ushbu bosqichda Mo‘g‘ulistonga qarshi bahs olib bordi. O‘ta dramatik kechgan o‘yinda Mendez shogirdlari qiyin g‘alabani qo‘lga kiritishdi.

Birinchi bo‘lim
Uchrashuvning startida o‘zbekistonliklar ketma-ket fol ishlatib, qoidabuzarliklar sonini 5taga yetkazib olishdi. Natijada, mo‘g‘ulllar dastlab jarima zarbasidan, so‘ngra dabl-penaltidan gol urishga muvaffaq bo‘lishdi. Shundan so‘ng futzalchilarimiz o‘zlariga kelishdi va ketma-ket hujum tashkil qilib, ketma-ket 3ta gol urishdi. Tomonlar yana bir martadan gol almashishdi va hisob 4:3ga yetdi. Bo‘lim so‘ngida Hoshimov qo‘pol o‘ynagani uchun maydondan chetlatildi. Sharqiy osiyoliklar imkoniyatdan foydalanib, hisobni tenglashtirishdi. Tanaffusga qadar O‘zbekiston yana bitta gol urdi va hisob 5:4ga yetdi.

Ikkinchi bo‘lim
Ikkinchi 20 daqiqalikda tomonlar nisbatan ehtiyotkor o‘yin namoyish qilishdi. Futzalchimiz bir vaziyatda yaqin masofadan bo‘sh darvozaga aniq zarba bera olmadi — to‘p yuqoriga ko‘tarilib ketdi. Mo‘g‘uliston esa 2 marta burchak to‘pidan samarali foydalandi. Bir vaziyatda o‘yinchimiz o‘z darvozasiga to‘pni burib qo‘ygan bo‘lsa, ikkinchisida raqibga zarba berish imkoniyatini berib qo‘yishdi — 5:6. Bu paytda o‘yinning asosiy vaqti tugashiga 3 daqiqa qolgandi. Mendez darvozabon o‘rniga darhol beshinchi o‘yinchi tushirdi. Bu taktika o‘z samarasini berdi va jamoamiz hisobni tenglashtirdi.

Ekstra-taymlar
Qo‘shimcha bo‘limlarning dastlabkisida hisob o‘zgarmadi. Ikkinchi 5 daqiqalik boshlanganda esa raqiblar "standart"dan foydalanib, hisobda oldinga chiqib olishdi. Terma jamoamiz joniga yana "power play" yordamga keldi. O‘zbekistonliklar beshinchi o‘yinchi taktikasi orqali nafaqat muvozanatni tiklashdi, balki hisobda ham oldinga o‘tib olishdi — 8:7.

Mo‘g‘ullar beshinchi o‘yinchi taktikasi tayyor emasligi ko‘rinib qoldi — ham himoyalanishda, ham bu taktikadan foydalanishdi. Darvozabon o‘rniga o‘yinchi tushishi ularga hech qanday naf keltirmadi, aksinsa raqib yana 2ta gol o‘tkazib yubordi. Yakuniy hisob — 10:7.

O‘zbekiston terma jamoasi hujumchisi Akbar Usmonov bu o‘yinda 6ta gol urishga muvaffaq bo‘ldi. Natijada uning musobaqadagi gollari soni 13taga yetdi.

Terma jamoamiz yarim final bosqichida Iroqqa qarshi bahs olib boradi. Bu o‘yin 24 may kuni soat 17:00da (Toshkent vaqti bilan) boshlanadi.

U-20 Osiyo chempionati
Chorakfinal, 22.05.2017
Indoneziya U-20 - Tailand U-20 – 2:4
Eron U-20 - Livan U-20 – 6:2
Iroq U-20 - Yaponiya U-20 – 1:0
O‘zbekiston U-20 - Mo‘g‘uliston U-20 – 10:7 (q.v.)

Yarimfinallar, 24 may
Tailand U-20 – Eron U-20
Iroq U-20 - O‘zbekiston U-20