Birinchi liga 11-turida Uychining «Xotira-79» jamoasi o‘z maydonida «Sementchi»ni qabul qildi.
O‘yin mehmonlarning 1:0 hisobidagi g‘alabasi bilan tugadi.
Bahsdan so‘ng, mezbonlar ustozi Mehmon Solixo‘jayev muxlislar oldiga chiqib, jamoaning ayanchli ahvoli haqida gapirdi.
«O‘yinda yigitlar imkoniyati boricha harakat qildi. Raqib jamoa bizdan kuchliligini isbotladi. Mag‘lubiyatlarga uchrashimizga qaramay o‘yingohga tashrif buyurayotgan sizlar kabi ishqibozlarga rahmat aytaman. To‘g‘risini aytganda, jamoamizda pul yo‘q. Agarda pulimiz bo‘lganda hozirgi futbolchilar jamoamizda to‘p surmasdi. Bundanda kuchlilarini safga chorlar edik. Mana, «Kosonsoy» jamoasi ham shu yo‘sinda yo‘q bo‘lib ketdi. Nailoj, hozircha imkonimiz shu xolos» - dedi murabbiy.
Ayni paytda «Xotira-79» musobaqa jadvalida 11 ochko bilan 11-o‘rinda bormoqda.
