Fuqarolarning hukumat idoralariga murojaatlarini chop etish bilan shug‘ullanuvchi Change.org saytida O‘zbekiston terma jamoasi bosh murabbiyi Samvel Babayanning iste’fosini talab qilib petisiya – talabnoma yaratildi.
Petisiya O‘zbekiston futbol federasiyasi rahbari Mirabro Usmonovga qaratilgan bo‘lib, uni saytga joylashtirgan shaxs o‘z nomini ma’lum qilmagan va «O‘zbekistonlik muxlislar» deb imzo chekkan.
Petisiyaning mazmuni quyidagicha:
«Hurmatli Mirabror Zufarovich, biz sizdan “O‘ZBEKISTON MILLIY TERMA JAMOASI BOSH MURABBIYI SAMVEL BABAYANNI DARHOL O‘Z LAVOZIMIDAN OZOD QILISH VA XORIJDAN KUCHLI MUTAXASSIS JALB ETISH ” xususida amaliy yordam ko‘rsatishingizni so‘raymiz!
Muhim o‘yinlardagi ketma-ket mag‘lubiyatlari va qo‘pol strategik xatolariga qaramay, O‘zbekiston Futbol Federasiyasi 2017 yil 15 iyun kungi majlisidan so‘ng, Babayan va uning boshchiligidagi murabbiylar shtabiga saralash yakuniga qadar imkoniyat berishga qaror qilganini ma’lum qildi.
Ikki oydan so‘ng bo‘lib o‘tadigan ikki muhim o‘yin arafasida bizdan ancha kuchli bo‘lgan, guruhda bizdan ham yaxshiroq holatda turgan Janubiy Koreya Futbol Federasiyasi ham o‘z murabbiyini iste’foga chiqardi va bu bilan avgust-sentyabrda Eron va O‘zbekistonga qarshi o‘tadigan “Rossiyaga borish” chiptasini beruvchi o‘yinlar uchun kuchli mutaxassis jalb qilish va muhim o‘yinda O‘zbekistonni yengib Jahon Chempionati-2018ga chiqish imkoniyatini O‘zbekistondan tortib olish istagini yaqqol namoyon qildi.
Hozir O‘zbekiston milliy terma jamoasida juda ham ajoyib imkoniyat bor va bu ish uchun salohiyati yetarli bo‘lmagan murabbiyning saqlab qolinishi muxlislarga nisbatan hurmatsizlikdir. Muxlislarning 25 yillik orzularini ikki dona o‘yin ro‘yobga chiqaradigan lahzalarda turibmiz. Shunday muhim pallada O‘zbekiston Futbol Federasiyasining Samvel Babayanga imkoniyat berish qarori ba’zi muxlislarning keskin tanqidiga uchradi va biz muxlislar uning shu paytgacha qilib kelgan xatolari, xalqaro miqyosdagi mutaxassis emasligi, jamoaga o‘yinchi tanlashda ishlatadigan chidab bo‘lmas nohaqliklari va boshqa o‘nlab omillar sabab S. Babayan imkoniyat berishga haqli deb hisoblamaymiz. Milliy Terma Jamoa S. Babayanning otasidan qolgan mulki emaski, unga imkoniyat berishda davom etilsa! Jahon Chempionatiga chiqa olinmagan taqdirda, Babayanni iste’foga chiqarish bilan muxlislarning qalbidagi yaralarini yuvib bo‘lmaydi.
Sizdan ayni damda milliy terma jamoani boshqarib turgan Samvel Babayanni lavozimidan ozod etish va zudlik bilan xorijdan kuchli mutaxassis jalb etish masalasini navbatdan tashqari tartibda ko‘rib chiqishingizni o‘tinib so‘raymiz» - deyiladi.
Petisiyani joylashtirgan shaxs uni O‘FF rahbariga yetkazilishini ta’kidlagan. Ayni paytda unga 24ta fuqaro imzo chekkan.
