“Buxoro” jamoasining qozog‘istonlik himoyachisi Kirill Pasichnik so‘nggi uchrashuvda qaydnomaga kiritilmagan edi. Bu holat muxlislarda turli savollarni uyg‘otgani tabiiy. Shu va boshqa masalalar to‘g‘risida biz Kirill bilan bog‘lanib, bu holatga oydinlik kiritib berishini so‘radik.

“Men bugungi kunda jamoa bilan birga emas man. Sababi sog‘ligim bilan jiddiy muammo yuzaga keldi va shu sababdan uyga qaytishga majbur bo‘ldim. Bu degani men “Buxoro”ni tark etdim degani emas. Ma’lum muddat davolanib, sog‘ligimni tiklab olganimdan so‘ng albatta jamoa ixtiyoriga qaytib kelaman. Ikkinchi davrada ham “Buxoro” sharafini himoya qilishni istayman. Jamoamning so‘nggi uchrashuvda o‘z maydonida mag‘lub bo‘lganidan qattiq xafa bo‘ldim. So‘nggi paytlarda negadir jamoamiz bir tekisda o‘yin namoish eta olmayapti, biz bundan ham yaxshiroq natijani qayd etishimiz mumkin edi, lekin yo‘q joydan turnir jadvalida bevosita raqobatchilarimiz bilan o‘yinda ochkolarni yo‘qotdik. “Obod”, “Mash’al” va “Navbahor” jamoalari bilan bo‘lgan uyinlarda kutilmaganda ochkolarni yo‘qotdik, aks holda bugun turnir jadvalida ancha yuqorida joylashgan bo‘lar edik. Bu muvaffaqiyatsizlik vaqtincha deb o‘ylaman, jamoamiz yangi. O‘yindan-o‘yinga jamoa o‘z o‘yinini topib bormoqda, bu esa quvonarli holatdir” - dedi Pasichnik.