Yaponiya poytaxti Tokio shahrida og‘ir atletika bo‘yicha yoshlar o‘rtasida jahon chempionati bo‘lib o‘tmoqda.

23 iyunga qadar davom etadigan musobaqada O‘zbekiston terma jamoasining uch nafar a’zosi ham ishtirok etyapti. Jumladan 77 kg. vazn toifasida Shahzod Xudoyberganov, 94 kg. vaznda Farxodbek Sobirov va 105 kg. vaznli polvonlar bahsida Akbar Jo‘rayevlar kunchiqar yurtda mamlakatimiz sharafini himoya qilishmoqda.

Vakillarimiz orasida birinchi bo‘lib 77 kg. vazn toifasida Shahzod Xudoyberganov bahslarga kirishdi. U dast ko‘tarishda 152 kg, siltab ko‘tarishda esa 186 kg. natija bilan umumiy 338 kg. og‘irglikni o‘ziga bo‘ysindirdi va ushbu ko‘rsatkich evaziga ikkinchi o‘rinni egallab, jahon chempionatining kumush medaliga sazovor bo‘ldi.

Ushbu vazn toifasida umumiy 356 kg. tosh ko‘targan kolumbiyalik Veyson Lopes oltin medalga ega chiqib, jahon chempionligini tantana qilgan bo‘lsa, bronza medali 335 kg. natija qayd etgan rossiyalik Vyacheslav Yarkinga nasib etdi.

Ertaga, 21 iyun kuni 94 kg. vazn toifasida Farxodbek Sobirov jahon chempionatidagi ishtirokini boshlaydi. 22 iyun sanasida esa og‘ir vazndagi polvonimiz Akbar Jo‘rayev bahslarga kirishadi. Biz har ikkala sportchimizga ham bo‘lajak bahslarda omad va zafarlar tilab qolamiz.