Janubiy Koreyaning Muju shahrida taekvondo bo‘yicha jahon chempionati bahslari davom etmoqda.
Bugun -53 kg vazn toifasida dunyo birinchiligida ishtirok etayotgan sportchimiz Dinoraxon Mamadibragimova finalga chiqish uchun turkiyalik Zeliha Agrishga qarshi dayanga chiqadi. Agar yarim finalda g‘alaba qozona olsa, u hal qiluvchi bosqichda Inese Tarvida (Latviya) / Tatyana Kudashova (Rossiya) to‘qnashuvi g‘olibiga qarshi jang qiladi. Final jangi ham bugun bo‘lib o‘tadi.
Bugun shuningdek, -87 kg vazn toifasida Davronbek Azimov o‘z omadini sinovdan o‘tkazsa, +87 kg vazn toifasida amaldagi jahon chempioni Dmitriy Shokin o‘z unvonini himoya qilishga kirishadi.
Qur’a natijalariga ko‘ra, Azimov ilk jangini rossiyalik Vladislav Laringa qarshi boshlaydi. Dmitriy Shokin esa chempionlik himoyasidagi ilk jangini turkiyalik yoki gresiyalik raqibga qarshi o‘tkazadi.
