29 iyun kuni Olimpiya shon-shuhrati muzeyida «Islom birdamlik o‘yinlari»da sovrindor bo‘lgan o‘zbekistonlik sportchilarni, ular qatorida sport sohasida mehnat qilayotgan bir qator jurnalistlarni taqdirlash marosimi bo‘lib o‘tdi.
Boku mezbonligida o‘tkazilgan IV «Islom birdamligi o‘yinlari»da ilk marta ishtirok etgan O‘zbekiston delegasiyasi 54 mamlakat orasida 4-o‘rinni qo‘lga kiritishga muvaffaq bo‘lgan va 63 ta medallar shodasiga ega chiqqandi: 15 ta oltin, 17 ta kumush va 31 ta bronza. MOQ huzuridagi «O‘zbekiston olimpiyachilarini qo‘llab quvvatlash jamoat fondi» sovrindor bo‘lgan 65 nafar sportchi va 87 murabbiyni taqdirlashga qaror qildi.
Unga ko‘ra, Boku—2017 festivalida qo‘lga kiritilgan har bir oltin medal uchun 10 million so‘m miqdorida mukofot puli tayin qilindi. Kumush uchun 5 milliondan, bronzaga 3 million so‘mdan ajratildi. Bunda sportchilar qo‘lga kiritgan har bir medali uchun alohida-alohida pul mukofotiga ega chiqishi belgilab qo‘yilgan, deb ma’lumot berdi MOQ matbuot kotibi Zafar Imomxo‘jayev. Masalan, yengil atletika sport turida mamlakat sharafini himoya qilib, 1 ta oltin va 3 ta kumush medalga ega chiqqan Anastasiya Serdyukova har bir mukofoti uchun alohida-alohida mukofotga loyiq ko‘rilgan.
MOQ sportchilarni sovrindor qilgan murabbiylarni ham unutmadi va ularga 5 million so‘mdan mukofot ajratishga qaror qildi. Mukofotlarni o‘z egalariga MOQ prezidenti Alisher Sultonov hamda Jismoniy tarbiya va sport davlat qo‘mitasi raisi Rustam Qurbonov topshirdi.
27 iyun — OAV xodimlari kuni munosabati bilan sohada faol mehnat qilayotgan bir qator jurnalistlarga ham esdalik sovg‘alari taqdim etildi. «Tashakkurnomalar»ni o‘z egalariga MOQ bosh kotibi Oybek Qosimov topshirdi.
