29 июнь куни Олимпия шон-шуҳрати музейида «Ислом бирдамлик ўйинлари»да совриндор бўлган ўзбекистонлик спортчиларни, улар қаторида спорт соҳасида меҳнат қилаётган бир қатор журналистларни тақдирлаш маросими бўлиб ўтди.

Боку мезбонлигида ўтказилган IV «Ислом бирдамлиги ўйинлари»да илк марта иштирок этган Ўзбекистон делегацияси 54 мамлакат орасида 4-ўринни қўлга киритишга муваффақ бўлган ва 63 та медаллар шодасига эга чиққанди: 15 та олтин, 17 та кумуш ва 31 та бронза. МОҚ ҳузуридаги «Ўзбекистон олимпиячиларини қўллаб қувватлаш жамоат фонди» совриндор бўлган 65 нафар спортчи ва 87 мураббийни тақдирлашга қарор қилди.

Унга кўра, Боку—2017 фестивалида қўлга киритилган ҳар бир олтин медаль учун 10 миллион сўм миқдорида мукофот пули тайин қилинди. Кумуш учун 5 миллиондан, бронзага 3 миллион сўмдан ажратилди. Бунда спортчилар қўлга киритган ҳар бир медали учун алоҳида-алоҳида пул мукофотига эга чиқиши белгилаб қўйилган, деб маълумот берди МОҚ матбуот котиби Зафар Имомхўжаев. Масалан, енгил атлетика спорт турида мамлакат шарафини ҳимоя қилиб, 1 та олтин ва 3 та кумуш медалга эга чиққан Анастасия Сердюкова ҳар бир мукофоти учун алоҳида-алоҳида мукофотга лойиқ кўрилган.

МОҚ спортчиларни совриндор қилган мураббийларни ҳам унутмади ва уларга 5 миллион сўмдан мукофот ажратишга қарор қилди. Мукофотларни ўз эгаларига МОҚ президенти Алишер Султонов ҳамда Жисмоний тарбия ва спорт давлат қўмитаси раиси Рустам Қурбонов топширди.

27 июнь — ОАВ ходимлари куни муносабати билан соҳада фаол меҳнат қилаётган бир қатор журналистларга ҳам эсдалик совғалари тақдим этилди. «Ташаккурномалар»ни ўз эгаларига МОҚ бош котиби Ойбек Қосимов топширди.