Janubiy Koreya terma jamoasi 31 avgust kuni JCH saralashidan o‘rin olgan Eronga qarshi o‘yinni Seuldagi muhtasham "Seoul World Cup Stadium"da o‘tkazadigan bo‘ldi. Bu haqda kecha Janubiy Koreya futbol assosiasiyasi xabar tarqatdi.

Ushbu o‘yinda mezbonlarni g‘alabadan boshqa har qanday natija qoniqtirmasligi tayin. Hozirda terma jamoaga bo‘lgan ishonch va futbolchilarning ruhiyati juda past holatda. Buning ustiga hozircha terma jamoa bosh murabbiyi kim bo‘lishi ham aniq emas. Katta ehtimol bilan ushbu o‘ringa bir necha mavsum "Ulsan"ga bosh murabbiylik qilgan va hozirda futbol assosiasiyasida faoliyat ko‘rsatayotgan Kim Ho Gon tayinlanishi mumkin.

Yangi tayinlanadigan murabbiy oldida qator muammolar va yuqori bosim bor. Jamoaning "koziri" hisoblangan Song Heung Min Qatarga qarshi o‘yinda tirsagini sindirib olgan. Jamoa sardori, "Suonsi" a’zosi Ki Song Yong hisobida sariq kartochka bor. U Eron bilan o‘yinda ogohlantirilsa 5 sentyabr kuni Toshkentga bormaydi. Eng katta muammo futbolchilarning ruhiyatini ko‘tarish masalasi ko‘ndalang turibdi. Hozircha koreyslarga yagona umid uchquni bo‘lib turgan narsa — Eronning JCH masalasini muddatidan avval hal qilganligi va Karlos Keyrushning Seulga ikkinchi tarkib futbolchilarini olib kelishi ehtimolidir. Shunday holatda ham Seulda o‘tadigan o‘yinda muxlislar bilan stadionni to‘ldirish oson emas. Koreys futbolchilari juda hissiyotli hisoblanishadi. Buni Janubiy Koreya futbol assosiasiyasining ismi oshkor etilmagan rahbari mahalliy "Football Journal" nashriga bergan intervyusida tasdiqlagan:

"Eronga boy berilgan safar o‘yinida stadion 75,800 nafar muxlis bilan to‘lgan edi. Ushbu tirbandlikni ko‘rib futbolchilarimiz o‘yin boshlanmay turib hayajondan titroqqa tusha boshlashdi. Bu aniq sezildi. Keyin voqealar rivojidan xabardorsiz".

Nima bo‘lgan taqdirda ham O‘zbekiston terma jamoasi Xitoy va Janubiy Koreyaga qarshi o‘tadigan o‘yinlarga jiddiy tayyorgarlik ko‘rishi lozim bo‘ladi.

Otabek Yo‘ldoshev
Janubiy Koreya, Seul