Xalqaro Olimpiya qo‘mitasi 2024 va 2028 yillardagi Olimpiadalar o‘tkaziladigan nomzod shaharlar Parij va Los-Anjeles bo‘lishi bo‘yicha yakuniy qarorga keldi.
Bu qaror Xalqaro Olimpiya qo‘mitasining Lozannada o‘tgan navbatdan tashqari sessiyasida qabul qilindi. Ikki shahar bo‘yicha ovoz berish sentyabr oyida bo‘lib o‘tadi.
Bunda, rejaga ko‘ra, 2024 yilgi Olimpiyadani o‘tkazish huquqini boy bergan shahar, avtomatik ravishda 2028 yilgisini o‘tkazish huquqini oladi.
Mazkur shaharlar o‘zaro kelishib olishsa, unda sentyabr oyida bo‘lib o‘tadigan so‘rovnoma shunchaki rasmiyatchilikka aylanadi. Agar bunday bo‘lmasa, unda 13 sentyabr kuni Lim shahrida jonli ovoz berish jarayonida 2024 yilgi Olimpiyada mezboni nomi aniqlanadi.
Eslatib o‘tamiz, 2024 yilgi Olimpiyada mezbonligiga Gamburg (Germaniya), Budapesht (Vengriya), Xarkov (Ukraina), Boston (AQSH) singari shaharlar ham da’vogarlik qilishgan edi. Biroq turli sabablarga ko‘ra, ular o‘z arizalarini qaytarib olishdi.
Navbatdagi Olimpiya o‘yinlari qachon va qayerda bo‘lib o‘tadi:
Qishki Olimpiya o‘yinlari-2018 - Koreya, Pxenchxan
Yozgi Olimpiya o‘yinlari-2020 - Yaponiya, Tokio
Qishki Olimpiya o‘yinlari-2022 - Xitoy, Pekin
Yozgi Olimpiya o‘yinlari-2024 - Parij yoki Los-Anjeles
Qishki Olimpiya o‘yinlari-2026 - saylov - 2019 yil yozda bo‘lib o‘tadi.
Yozgi Olimpiya o‘yinlari-2028 - Parij yoki Los-Anjeles
