Ayrim futbolchilar og‘ir jarohatdan so‘ng butsalarini mixga ilishadi yoki omma e’tiboridan chetda qolishadi. Matbuotda ular haqidagi maqolalar kamayadi, o‘zlari ham nomlarini yodga solish uchun ortiqcha urinishmaydi.
Ammo bugungi qahramonimiz bunday mavhumlikdan yiroq. Zlatan Ibragimovich jiddiy shikastlanishdan keyin shunchaki, futbolni tashlab ketolmaydi. Bunga yetarlicha sabablar bor.
Joriy yilning 20 aprel kuni jarohat olgan Zlatan keyinchalik ham muxlislar nazaridan chetda qolmadi. Mazmunli hayot tarzi - birinchi sabab, ikkinchisi esa - undagi xudbinlik. Ibragimovich o‘zining takabburligi orqali OAVda ajoyib yangiliklar yaratishga moyil. Xo‘sh, «Anderlext» bilan o‘yinda oyog‘ini qayirib olgan futbolchi bugungi kunda nimalar bilan band?
Bu jarayon o‘ta tezkor tarzda davom etmoqda. Aslida, uning jarohati 35 yoshlilar uchun o‘ta jiddiy hisoblanadi, shu bois Zlatan o‘zgacha shifokor topishga erishdi. Pittsburg universitetining jarrohlik departamenti rahbari Freddi Fu ba’zan sportchilarning muammolari bilan shug‘ullanadi - agar vaziyat o‘ta og‘ir bo‘lsa. Hozirga qadar ulkan yutuqlarni qo‘lga kiritgan tibbiyot xodimi sharafiga bayram ham o‘ylab topishgan: har yili 13 sentyabr Pittsburgda Freddi Fu kuni sifatida nishonlanadi.
1 mayda muvaffaqiyatli operasiya o‘tkazildi. Ertasiga Zlatan oyog‘ini suratga olib, «Instagram»ga joylashtirdi va ostiga «Qo‘llab-quvvatlaganlarga rahmat. Tez orada hammamiz birgalikda o‘yinimdan bahramand bo‘lamiz», - deb yozdi.
Tiklanishning dastlabki davrida u shikoforlarning muntazam kuzatuvi ostida bo‘lishi lozim edi. Bunga qadar Zlatan mashg‘ulot o‘tkazdi, basseynga qatnadi va jamoadoshlarini qo‘llab-quvvatladi.
Yaqinda mashg‘ulotini videotasmaga muhrlab, uni «Sherlar odamlardan farqli ravishda boshqacha tiklanishadi», deb atadi. Xullas, qaytishga jiddiy kirishganini ko‘rsatdi. Darvoqe, uning agenti Mino Rayolaning ta’kidlashicha, Ibragimovichning tizzalaridagi kuchdan hayratlangan shifokorlar undan o‘yinchilik faoliyatini yakunlagach, tadqiqot o‘tkazish uchun yana klinikiga tashrif buyurishini so‘rashgan. Ha, bu Rayola. Ma’lumotni turlicha baholash mumkin.
«Ushbu o‘yinda o‘ziga yarasha missiyam bor edi: jamoani qo‘llab turdim». Jarohat tufayli qo‘ltiqtayoq tutgan futbolchilarning Mourinyo ko‘rsatmasiga binoan maydon chetida saf tortishgani hammaning yodida. Zlatan bu guruhning rahbari edi, uning libosi ham bosh-qalarnikidan ajralib turgandi: boshqa sheriklaridek kulrang kostyum kiymagandi. G‘alabadan so‘ng Zlatan xohlagancha vaqtichog‘lik qildi: jamoadoshlari, ishqibozlar va kubok bilan selfiga tushdi.
Ha, takliflar juda ko‘p. MLSning ikkita («Los-Anjeles Gelaksi va «Mayami») klubidan tashqari, Berlinning «Gerta», Istanbulning «Fenerbaxche» hamda Milan «rossoneri»si ham shvesiyalik hujumchini o‘z tarkibida ko‘rishga ishtiyoqmand. Italiya jamoasi sobiq rahbari Silvio Berluskoni Zlatanni yana «Milan» libosida ko‘rishdan quvonishini aytganda, bu gap Rayolaga yoqib tushdi va u funksioner manziliga iliq fikrlar bildirdi.
Umuman, Mino mijozining rejalari haqida ochiq-oydin gapirishdan qochmaydi. «Zlatan Manchesterda qolmoqchi», - dedi u shartnoma yakunlanishidan ikki hafta oldin. Ha, klub bilan kelishuv uzaytirilmadi. «Zlatan Angliyada qolmoqchi», - dedi Rayola iyun oyi boshlarida. «Zlatan AQSHga ketmaydi. U Yevropada qolib, yuqori darajali futbol namoyish etadi», - dedi yana bir haftadan keyin. Ispaniyaning Marca nashri shvedning tez orada AQSHga ko‘chib o‘tishi haqida yozdi. Futbolchining qarindoshi esa Bekxem jamoasi to‘rt yillik shartnoma va 25 mln. dollarlik maosh taklif qilganini aytarkan, Ibragimovichning shu zahoti rad javobini berganini ham qo‘shimcha qildi.
Har holda, Mino Rayolaning hozir nima bilan band ekani tayin. Hamma takliflarni jamlab, eng ma’qulini tanlaydi. Albatta, uning «Milan»dagi mojarolardan ortmayotganini ham unutmaslik darkor. Hozir agentning eng katta muammosi - Janluiji Donnarumma.
Darhaqiqat, Zlatan futbol o‘ynamasa ham hamisha omma e’tiborida. Ikki oylik tiklanish jarayonida uning «Instagram»dagi sahifasiga ikki milliondan ko‘proq muxlis a’zo bo‘ldi. Yaqinda Ibragimovich Stokgolmdagi «Frends» stadioni yonida uning sharafiga atab haykal barpo etilishi borasida fikr bildirdi: «Shvesiya ramzi deyarli tayyor». Aytgancha, haykal Yevropa Ligasi finali arafasida qad rostlashi kutilgandi. Yarim yil avval OAV ushbu jarayon mavsum oxirida yakunlanishini aytgandi. Ammo Zlatan vaqti-vaqti bilan haykalning yangi parchasini videotasmaga muhrlab, internetga joylashtirarkan, ushbu ijod namunasining bitkazilishi kimnidir qiziqtirarmidi?
Dastlab «MYU» bilan qishgacha shartnoma imzolashi haqida yozishdi. Shuningdek, «Atletiko» xususida yangilik paydo bo‘ldi, ammo madridliklar prezidenti Enrike Sereso bu xabar haqiqatdan yiroq ekanini ta’kidladi. Shunday pallada Zlatan futbolga qaytishni chin dildan xohlaganidan, hattoki, uxlayotganda ham butsasini yechmayapti.
