«Milan» bosh murabbiyi Vinchenso Montella «Yuventus» himoyachisi Leonardo Bonuchchining transferi haqida o‘z fikrini aytdi.
«Bonuchchi – dunyo darajasidagi o‘yinchi. O‘ylashimcha, u va Serxio Ramos dunyoning eng kuchli himoyachilari hisoblanadi. Men Leonardo bilan ishlashni orzu qilgandim. Bu transfer uchun Fassone va Mirabelliga minnatdorchilik bildiraman.
Klub transfer bozorida tajribali futbolchilar bilan birga yosh o‘yinchilarni taklif etib, noodatiy ishlamoqda. Ko‘pchilik boshqa ligadan kelib qo‘shilmoqda, shu sababli ko‘nikib olish uchun ularga biroz vaqt kerak bo‘ladi, biroq men har bir yangi futbolchiga ishonaman. Rostini aytsam, men ortiqcha bosimni ko‘rmayapman. Menga kuchli o‘yinchilar bilan ishlash osonroq.
Maqsadimiz – Chempionlar ligasiga qaytish. Bonuchchi va Bilyaning transferi bizga bu yo‘lda katta yordam beradi. Yigitlar kuchli jamoa bo‘lishimiz uchun harakat qilmoqda» - dedi Montella.
