Londonda davom etayotgan para-atletika bo‘yicha jahon chempionatining dastlabki uch kunida hamyurtlarimiz 2 ta oltin medalga sazovor bo‘lib ulgurishdi.

Buyuk Britaniya poytaxtida o‘tkazilayotgan para-atletika bo‘yicha jahon chempionatida hamyurtimiz Doniyor Soliyev delegasiyamiz hisobiga ikkinchi oltin medalni qo‘shib qo‘ydi. Erkaklar o‘rtasida uzunlikga sakrash bo‘yicha bahslarda ishtirok etgan Doniyor 7.18 metr natijasi bilan oltin medalga sazovor bo‘ldi va o‘zining ushbu natijasi evaziga Osiyo rekordini yangiladi. (Osiyo rekordi 2015 yil Qatarning Doha shaxrida bo‘lib o‘tgan jahon chempionatida Xitoylik Chen Ming Yu tomonidan 7.07 metr natijasi bilan o‘rnatilgan edi). Musobaqada ikkinchi o‘rinni shvesiyalik Tobias Jonson (6.99 metr) egallagan bo‘lsa, 3-o‘rin 6.77 metr natija qayd etgan beloruslik Sergey Burdukovga nasib etdi.

Shuni ta’kidlash lozimki, uzunlikga sakrash musobaqasida jaxonning ko‘zga ko‘ringan, kuchli sportchilari ishtirok etishdi, ular orasida Paralimpiya o‘yinlari chempioni va rekordchisi Xilton Langenxoven xam o‘z omadini sinab ko‘rdi.

Eslatib o‘tamiz, jahon chempionatining ikkinchi kuni terma jamoamiz a’zosi Xusniddin Norbekov disk uloqtirish bo‘yicha 54.73 metr natija bilan birinchi o‘rinni egallab, ikkinchi marotaba jaxon chempioni unvonini qo‘lga kiritgan edi. 100 metrga yugurish bahslari ishtirok etgan Mansur Abdurashidov esa afsuski final bosqichiga chiqa olmadi. Oldinda sportchilarimizni yadro va nayza uloqtirish, shuningdek turli masofalarga yugurish musobaqalari kutib turibdi. Ma’lumot uchun, mazkur jahon chempionati 23 iyulga qadar davom etadi va unda 1050 nafar sportchi 213ta medallar jamlanmasi uchun kurash olib boradi.