Futbol bo‘yicha O‘zbekiston U23 terma jamoasi 2018 yilning yanvarida Xitoyda bo‘lib o‘tadigan Osiyo chempionatida ishtirok etish huquqini qo‘lga kiritdi.
Jamoa saralashda yuz foizlik natija qayd etib, har uch o‘yinda ham 2 tadan gol farqi bilan zafar quchdi: Livan 3:1, Nepal 2:0, BAA 2:0. Amirlik termasiga qarshi bellashuvdan keyin bosh murabbiy Ravshan Haydarov o‘z fikrlari bilan o‘rtoqlashdi.
"Havo juda issiq bo‘lishiga qaramay, shogirdlarim xarakter ko‘rsatdi. Biz o‘ylangan taktika evaziga zafar quchdik.
Bugun kuch jihatdan bir-biriga yaqin jamoalar kurash olib bordi. Himoyada xatoga yo‘l qo‘ymaganimiz sababli gol o‘tkazmadik. O‘yinning boshidan to oxiriga qadar nazoratni o‘z qo‘limizda ushlab turdik. Osiyo chempionatiga yo‘llanmani qo‘lga kiritganimizdan xursandmiz. Endi bu g‘alabani o‘z muxlislarimiz bilan nishonlaymiz" - dedi Ravshan Haydarov, O‘zbekiston U23 bosh murabbiyi.
