Футбол бўйича Ўзбекистон U23 терма жамоаси 2018 йилнинг январида Хитойда бўлиб ўтадиган Осиё чемпионатида иштирок этиш ҳуқуқини қўлга киритди.
Жамоа саралашда юз фоизлик натижа қайд этиб, ҳар уч ўйинда ҳам 2 тадан гол фарқи билан зафар қучди: Ливан 3:1, Непал 2:0, БАА 2:0. Амирлик термасига қарши беллашувдан кейин бош мураббий Равшан Ҳайдаров ўз фикрлари билан ўртоқлашди.
"Ҳаво жуда иссиқ бўлишига қарамай, шогирдларим характер кўрсатди. Биз ўйланган тактика эвазига зафар қучдик.
Бугун куч жиҳатдан бир-бирига яқин жамоалар кураш олиб борди. Ҳимояда хатога йўл қўймаганимиз сабабли гол ўтказмадик. Ўйиннинг бошидан то охирига қадар назоратни ўз қўлимизда ушлаб турдик. Осиё чемпионатига йўлланмани қўлга киритганимиздан хурсандмиз. Энди бу ғалабани ўз мухлисларимиз билан нишонлаймиз" - деди Равшан Ҳайдаров, Ўзбекистон U23 бош мураббийи.
