O‘zbekiston Birinchiligida Namangan viloyati nomidan ishtirok etayotgan "Norin" hamda "Xotira-79" jamoalari ham ikkinchi davra taraddudini davom ettirishmoqda.
Xususan, "Norin" jamoasi Vali Keldiyev qo‘l ostida o‘z qarorgohida mashg‘ulotlarni olib bormoqda. Haqqulobodliklar hozirga qadar uchta nazorat uchrashuvini o‘tkazishga erishishdi. Dastlab Farg‘onada "Neftchi" bilan bellashgan "Norin" 3:1 hisobida mag‘lub bo‘ldi. Keyinroq "Andijon"ning ikkinchi tarkibi bilan kuch sinashib 5:0 hisobida zafar quchildi. Kuni kecha esa haqqulobodliklar "UzDongJu" bilan durang o‘ynashdi - 1:1. Tarkibda bir qancha o‘zgarishlar kuzatilgan. Jamoaning asosiy himoyachisi Murod To‘ychiboyev "Neftchi"ga borib qo‘shilgan.
Uychining "Xotira-79" jamoasida yana murabbiy o‘zgardi. Oradan roppa rosa bir yil o‘tib Rustam Do‘rmonov yana jamoa postiga qaytib keldi. Do‘rmonov "Navbahor"dan ketgach ma’lum vaqt ishsiz qolgandi. Uychiliklar tarkibida ham o‘zgarishlar yaqin kunlarda kuzatiladi.
