Ўзбекистон Биринчилигида Наманган вилояти номидан иштирок этаётган "Норин" ҳамда "Хотира-79" жамоалари ҳам иккинчи давра тараддудини давом эттиришмоқда.
Хусусан, "Норин" жамоаси Вали Келдиев қўл остида ўз қароргоҳида машғулотларни олиб бормоқда. Ҳаққулободликлар ҳозирга қадар учта назорат учрашувини ўтказишга эришишди. Дастлаб Фарғонада "Нефтчи" билан беллашган "Норин" 3:1 ҳисобида мағлуб бўлди. Кейинроқ "Андижон"нинг иккинчи таркиби билан куч синашиб 5:0 ҳисобида зафар қучилди. Куни кеча эса ҳаққулободликлар "УзДонгЖу" билан дуранг ўйнашди - 1:1. Таркибда бир қанча ўзгаришлар кузатилган. Жамоанинг асосий ҳимоячиси Мурод Тўйчибоев "Нефтчи"га бориб қўшилган.
Уйчининг "Хотира-79" жамоасида яна мураббий ўзгарди. Орадан роппа роса бир йил ўтиб Рустам Дўрмонов яна жамоа постига қайтиб келди. Дўрмонов "Навбаҳор"дан кетгач маълум вақт ишсиз қолганди. Уйчиликлар таркибида ҳам ўзгаришлар яқин кунларда кузатилади.
