Lionel Messi. Bu futbolchi ayni damda millionlar o‘yinining tirik afsonalaridan biri hisoblanadi. Ayniqsa, «Barselona»ni usiz tasavvur qilish qiyin. Bugungi sahifamizda argentinalik futbolchi haqida bildirilgan hamda unga tegishli bo‘lgan fikrlarini e’tiboringizga havola etamiz.
«Messining ustunligi shundaki, u har bir o‘yinda ishtirok etishni xohlaydi. U hatto mashg‘ulotlarda ham g‘olib bo‘lishga o‘rgangan. Leo mashg‘ulotlarda o‘ziga xos futbolchi sifatida ajralib turadi. Gol uradi va buning uchun darvozabondan uzr ham so‘rab qo‘yadi. Men bunaqa xarakterdagi futbolchini ilgari ko‘rmaganman». Bu fikrlar fransiyalik sobiq futbolchi Tyerri Anriga tegishli.
Messining o‘zi esa doim kamtarlikka intilgan. U har qanday vaziyatda ham o‘zini boshqara olishini ko‘p bora ta’kidlaydi. Quyidagi fikrlar esa Messining qanday inson ekanligini anglashga yordam bersa, ajab emas.
«Men rekordlarimga e’tibor bermayman. Chunki rekord uchun o‘ynamayman. To‘g‘ri, ko‘p gol urishga harakat qilaman. O‘ylashimcha, hujum chizig‘ida to‘p surgan har qanday futbolchi gol urishga intiladi. Quvonch olib keladigan mukofotlar ham ikkinchi darajali. Mening kuchim shundaki, sovrinlarni «Barselona» bilan birga qo‘lga kiritaman».
«Men futbol o‘ynashni, mashg‘ulotlarni yoqtiraman. Futbol olamida so‘nggi yillarni o‘z ichiga olgan hayotim — shunchaki fantastika. Bir narsaga odatlanmagan — agar qaysidir harakatim o‘xshamay qolsa, uni qayta va qayta takrorlayman. Sen shug‘ullanasan, o‘ynaysan, g‘alaba qozonasan — bu hayotingni zavqqa to‘ldiradi».
2014 yil Messiga omadsiz keldi. «Barselona» Ispaniya milliy chempionatida omadsizlikka uchradi, chempionlikni «Atletiko» ilib ketdi. Bu ham yetmagandek, UYEFA Chempionlar ligasi chorak finalida yana «Atletiko» Messi va uning jamoadoshlarini to‘xtatib qoldi. Ammo bu omadsizlik oxirgisi emasdi. Jahon chempionati finalida Argentina terma jamoasi Germaniyaga imkoniyatni boy berdi. Garchi Messi musobaqaning eng yaxshi futbolchisi deb topilgan bo‘lsa-da, u amalda hech narsa qila olmagandi. Mazkur voqealarni Leo quyidagicha eslaydi:
