Bekobodning “Metallurg” jamoasi poytaxt viloyatining “Do‘stlik” jamoa xo‘jaligida navbatdagi nazorat uchrashuvini Tojikistonning “Istiqlol” futbolchilariga qarshi o‘tkazdi.   Avvalgi ko‘rik o‘yinlariga nisbatan bu safar bekobodliklarning o‘yini unchalik qovushmaganligini aytib o‘tish lozim. Shundan bo‘lsa kerak, murabbiylar shtabi tanaffusdan so‘ng aksariyat o‘yinchilarni jiddiy tanqib ostiga oldi va ularning o‘rniga maydonga yosh, g‘ayratli futbolchilarni tushirdi.   Bevosita o‘yin tafsilotiga to‘xtaladigan bo‘lsak, hududiy ustunlik “Metallurg” futbolchilari tomonida bo‘ldi. Ular o‘yinning 17-daqiqasida hisobni ochishga muvaffaq bo‘lishdi. Jahongir Abdumo‘minovning ajoyib to‘p oshirishidan so‘ng Islom Isoqjonov raqib darvozaboni bilan yakkama yakka chiqdi va vaziyatni golga aylantirdi – 1:0.   Shundan keyin ham ma’danchilarda bir qator imkoniyatlar bo‘ldi. Biroq bekobodliklarga bunday vaziyatlarda sovuqqonlik yetishmadi. “Istiqlol” esa uchrashuvning so‘nggi soniyalarigacha kurashdan charchamadi va hakam tomonidan qo‘shib berilgan kompensasiya vaqti o‘tib borayotganda javob golini kiritish maqsadiga erishdi – 1:1.   “Metallurg” bu o‘yinni quyidagi tarkibda o‘tkazdi: Zafar Safayev, Mirg‘iyos Sulaymonov, Hikmat Hoshimov, Doniyor Odilov, Abror Husinov, Ayubxon No‘’monov, Jahongir Abdumo‘minov, Javohir Esonqulov, Murodjon Toshmatov, Islom Isoqjonov, Zohid Abdullayev. zahiradan maydonga tushganlar: Timur To‘ychiyev, Muhammadjon Sultonov, Abror Toshqo‘ziyev, Davronbek Karimqulov, Muhammadodil Qahramonov, Sanjar Qodirqulov, Alisher Ziyovuddinov, Xudoyshukur Sattorov, Jasur Ahmedov.