“Sho‘rtan” jamoasi Edgar Gess bilan kelisholmadi va u bosh murabbiylikka tayinlanmadi.
Klub rasmiy sayti xabariga ko‘ra, mutaxassis bilan og‘zaki kelishuvga erishilgandi. Ammo “Sho‘rtan” PFK takliflari Gessning “katta” talablariga to‘g‘ri kelmadi. Natijada u bilan shartnoma imzolanmadi. Klub nimani taklif qilgani, Gess esa aynan nimani talab qilgani saytda yoritilmagan.
Endi jamoa mashg‘ulotlarini Vitaliy Legay va Gennadiy Kochnev olib boradi. Ayni paytda asosiy ishlar ana shu ikki mutaxassis zimmasiga yuklatilgan. Klub rahbariyati bosh murabbiy masalasi hal bo‘lgunga qadar, jamoani vaqtincha boshqarib turish vazifasini Legay Vitaliy Aleksandrovichga topshirdi.
