Bugun katta futbol oqshomi. Bugun professional futbolning chinakam shiddatini sog‘inib qolganlar uchun ajoyib tuhfa bor. Bu “Real” hamda “Manchester Yunayted” to‘qnashuvi. Ikkita gigant to‘qnashuvi, qaysiki Chempionlar ligasi giganti Yevropa ligasi gigantiga qarshi kurash olib boradi va supergigant aniqlanadi.
Ko‘pchilik Joze mag‘lubiyatni tan olgan, deb gapiryapti. Yana ko‘pchilik esa “Manchester Yunayted” tarkibidagi 6 ta yo‘qotishdan fojia yasab oldi. Ammo unutmang, bu O‘zbekiston milliy terma jamoasi emaski bitta futbolchining o‘rni darrov bilinib qolsa. Yoki Joze Babayan emaski, yo‘qotishlardan shokka tushib, nima qilarini bilmasa...
Bu Joze Mourinyo. Bir paytlar “Inter” bilan “Barselona”ni zor qaqshatgan mutaxassis. U bir paytlar “Real”da ham ishlagan. Aytmoqchimizki, ayni damda “Bugun qanday taktika qo‘llasam ekan?” deydigan darajada uquvsiz yoki tajribasiz emas. Qolaversa, uning muammolari oldingidan kamroq bo‘ladi, boisi, ayni damdagi Zidan “charchamagan” deya ta’riflagan “Real” ham ja optimal formada emas. Qolaversa, Mourinyu “Real”ning taktikasini yaxshi biladi. Joze biladigan taktika esa hali to‘liq o‘zgargani yo‘q. Har holda “Real” taktikasini katta darajada o‘zgartiradigan jamoa emas.
Ronalduni yopsa bo‘ladi. Ayni damda ta’tildan maza qilib qaytgan futbolchining qisqa muddatda formasini tiklab olishi qiyinroq masala. Hatto u Ronaldu bo‘lsa ham. Beyl esa hali-hamon o‘ziga kela olgani yo‘q. Mavsumoldi tayyorgarlik o‘yinlarida ko‘rdikki, hozirgi Beyl avvalgidek tog‘ni talqon qiladigan darajada emas. Benzema esa hozirda labirintga o‘xshab qolgan. U haqda aniq bir fikr bildirish mushkulroq.
Ochiq futbolni yoqtiradi Joze. Har holda, bugun ham shu taktikaga suyansa kerak. To‘g‘ri, u yopiq futbolga ham murojaat qilib turadi agar vaziyat taqozo qilsa. Ya’ni dastlab gol ursayu, raqib hujumkorlikka zo‘r bersa, himoyaviy o‘yinga o‘tishi mumkin. Agar bugun “Manchester Yunayted”dan kimdir Navasni dog‘da qoldirsa, keyin Zidanga mushkul bo‘lishi tayin.
Endi anavi 6 futbolchi masalasiga to‘xtalsak. Ular orasida jiddiy yo‘qotishlari bor, ammo ularning o‘rnini to‘ldirsa bo‘ladi.
Xullas, hammasi Joze Mourinyoning o‘ziga bog‘liq. U esa kutilmagan taktikalar tanlab qo‘ygani tayin. Axir Yevropa superkubogi oddiy turnir emas. Yevropa superkubogi jiddiy musobaqa ayniqsa hozirgi “Manchester Yunayted” uchun. Axir kim ham sovrinni yo‘lda tashlab ketishni istaydi deysiz.
Nizomjon ISLOMOV
