Angliya Premyer-ligasining 2017/2018 yilgi mavsumi boshlandi. Angliya futbolini sog‘ingan muxlislar uchun "Arsenal" va "Lester" klublari ajoyib spektakl uyushtirib berishdi.

"Kanonirlar" bahsning 2-daqiqasidayoq jamoaning yangi a’zosi Lyakazettning goli evaziga hisobni ochishga muvaffaq bo‘lishdi. "Tulkilar" hisobni tenglashtirishlari uchun atigi 3 daqiqa yetarli bo‘ldi, gol muallifi — Okadzaki.

O‘yin startida gol almashib olgan jamoalar biroz tanaffus olgandek bo‘lishdi. Shundan keiyn "Arsenal" tashabbusni o‘z qo‘liga olganiga qaramay, o‘z darvozasidan to‘p o‘tkazib yubordi: 29-daqiqada Vardi qanotdan yetkazilgan uzatmani darvozaga burib yubordi. Arsen Venger shogirdlari o‘tkazib yuborilgan goldan keyin o‘zlarini yo‘qotib qo‘ygan bo‘lsalar-da, bo‘lim so‘ngida muvozanatni tiklashdi: muvaffaqiyatli amalga oshirilgan kombinasiya natijasida Uelbek bo‘sh darvozani ishg‘ol qildi.

Ikkinchi bo‘limning 56-daqiqasida Vardi yana "Arsenal"ning mazasini qochirdi. Mahrez burchakdan yetkazib bergan uzatmani angliyalik hujumchi bosh bilan darvozaga joylab qo‘ydi va "Lester" ikkinchi marta hisobda oldinga chiqib oldi. Ammo o‘yinning so‘nggi daqiqalarida "kanonirlar" iroda namoyish qilishdi. Venger maydonga Remzi va Jiruni tashladi. Aynan ular "tulkilar" darvozasiga aniq zarbalar berib, "Arsenal"ga chiroyli g‘alabani taqdim etishdi!

APL, 1-tur
Arsenal – Lester 4:3 (2:2, 2:1)
11 avgust, 23.45, «Emireyts»
Gollar: 1:0 – 2 Lyakazett, 1:1 – 5 Okadzaki, 1:2 – 29 Vardi, 2:2 – 45 Uelbek, 2:3 – 56 Vardi, 3:3 – 83 Remzi, 4:3 – 85 Jiru.
Arsenal – Chex, Xolding (Jiru, 67), Monreal, Kolashinas, Belyerin, El-Nenni (Remzi, 67), Jaka, Oksleyd-CHemberlen, O‘zil, Uelbek (Uolkott, 75), Lyakazett.
Lester – Shmeyxel, Simpson, Morgan, Maguayr, Fuks, Marez, Djeyms (Ixeanacho, 82), Ndidi, Olbrayton (Grey, 88), Okadzaki (Amarti, 72), Vardi.
Ogohlantirish: Morgan (90).