«Chelsi» bosh murabbiyi Antonio Konte «Byornli»ga qarshi bo‘lib o‘tgan o‘yin (2:3) borasida o‘z fikrlari bilan o‘rtoqlashdi.

«Keyxillning maydondan chetlatilishi hal qiluvchi vaziyat bo‘ldi. Uchrashuvning qolgan qismini biz dastlab 10 kishi bo‘lib, keyin 9 kishi bo‘lib o‘tkazdik. Bu esa oson emas. So‘nggi o‘yinlarni jamoamiz yo 10 kishi bo‘lib yoki 9 kishi bo‘lib tugatyapmiz. 9-10 futbolchi bilan o‘ynash uchun jamoani yangi sxemaga moslashtirishim kerak. Hakamlik haqida hech narsa demoqchi emasman.

O‘yinning oxiriga qadar ijobiy natijaga erishishga harakat qildik. Afsuski, buni uddalay olmadik. Tanaffusdan keyin jamoa yaxshi kurashdi, ammo birinchi bo‘limda qizil kartochkadan keyin o‘zimizni yo‘qotib qo‘ydik. Ikkita gol o‘tkazib yubordik va yakuniy natijani o‘zgartirish qiyin kechdi.

Muhimi, Morata bizning falsafamizga moslashib olishi. Bugun u to‘g‘ri yo‘nalishda yaxshi o‘yin o‘tkazdi. U jamoaning boshqa futbolchilari bilan birga ishlashda davom etishi kerak. Men Diyego Kosta haqida savollarga javob berishni istamayman, boisi, u men uchun o‘tmish», – dedi Konte.