«Челси» бош мураббийи Антонио Конте «Бёрнли»га қарши бўлиб ўтган ўйин (2:3) борасида ўз фикрлари билан ўртоқлашди.

«Кэйхиллнинг майдондан четлатилиши ҳал қилувчи вазият бўлди. Учрашувнинг қолган қисмини биз дастлаб 10 киши бўлиб, кейин 9 киши бўлиб ўтказдик. Бу эса осон эмас. Сўнгги ўйинларни жамоамиз ё 10 киши бўлиб ёки 9 киши бўлиб тугатяпмиз. 9-10 футболчи билан ўйнаш учун жамоани янги схемага мослаштиришим керак. Ҳакамлик ҳақида ҳеч нарса демоқчи эмасман.

Ўйиннинг охирига қадар ижобий натижага эришишга ҳаракат қилдик. Афсуски, буни уддалай олмадик. Танаффусдан кейин жамоа яхши курашди, аммо биринчи бўлимда қизил карточкадан кейин ўзимизни йўқотиб қўйдик. Иккита гол ўтказиб юбордик ва якуний натижани ўзгартириш қийин кечди.

Муҳими, Мората бизнинг фалсафамизга мослашиб олиши. Бугун у тўғри йўналишда яхши ўйин ўтказди. У жамоанинг бошқа футболчилари билан бирга ишлашда давом этиши керак. Мен Диего Коста ҳақида саволларга жавоб беришни истамайман, боиси, у мен учун ўтмиш», – деди Конте.