«Zenit» Rossiya chempioni «Spartak» bilan bo‘lgan bahsda yirik hisobda (5:1) g‘alaba qozondi. O‘yindan so‘ng piterliklarning serbiyalik himoyachisi Branislav Ivanovich rossiyalik jurnalistlarning savollariga javob berdi.
- Tashqaridan qaraganda, «Zenit» «Spartak»ni osonlikcha mag‘lub etdi...
- Bu o‘yinga jiddiy tayyorgarlik ko‘rgandik. Avvaliga oson bo‘lmasligini bilgandik. Biz yaxshi vaziyatlarni yaratdik. «Spartak» esa bunga javob bera olmadi. «Zenit» katta tashabbusga ega chiqdi. Ikkinchi bo‘limning dastlabki 15 daqiqasida temp biroz pasaydi. Qolgan vaqtda esa ustunlik biz tomonda bo‘ldi.
- Roberto Manchini jamoani qanday ruhlantirdi?
- O‘yindan oldin bunday bahslarga futbolchilarni ortiqcha ruhlantirish shart emasligini bildirdi. Qo‘shimchasiga, bu mavsumning eng muhim uchrashuvlaridan biri ekanini ta’kidladi.
- O‘yin paytida murabbiy Domeniko Krishitoga qog‘ozdagi yozuvlar orqali ko‘rsatma berdi. Bunday holat ko‘p kuzatiladimi?
- Oldimizda ikki-uchta variant bor edi. Hisobga qarab joylashishimiz talab etilardi.
- Emanuel Mammana ikkingiz juftlikda o‘ynadingiz. U bilan til topishib oldinglarmi?
- Ha. Mammana qiyin o‘yin o‘tkazdi. Chunki bunday jamoaga qarshi birinchi marta to‘p surdi. Harakatlari yomon chiqmadi. Umuman olganda, mazkur bahsda butun jamoamiz yaxshi o‘ynadi.
- Sizning «Zenit»dagi birinchi o‘yiningiz yaxshi chiqmagandi. Xo‘sh, Mammana nimaning evaziga «Spartak»ka qarshi kechgan kechgan birinchi uchrashuvidayoq ko‘ngildagidek to‘p surdi?
- Qaytarib aytaman, biz yaxlit jamoa sifatida yaxshi o‘ynadik. Agar futbolchilar murabbiyning aytganlarini bajaradigan kayfiyatda bo‘lishsa, hammasi o‘z-o‘zidan o‘nglanaveradi. Bugun shunday holat kuzatildi.
- Rossiyalik hakamlarni hamisha tanqid qilishadi. Sizningcha, Rossiya chempionatidagi referilar darajasi qanday?
- Bu savolga hamisha bir xil javob beraman: hakamlarning harakatiga izoh bermayman. Barcha qo‘lidan kelgancha o‘z vazifasini yaxshi bajarishga urinmoqda. Futbolchilar va klublar hakamlar ishiga baho bermasliklari kerak. Ular o‘z ishlarini qilishmoqda.
- Aytaylik, saviya o‘rtachami?
- Ha, futbolchi sifatida buni his qildim.
- O‘yindan oldin yog‘ib o‘tgan do‘lni birinchi marta ko‘rishingizmi?
- Ha, oldin hech bunday hodisani kuzatmagandik. Xayriyatki, maydon holati tezda yaxshilandi.
- Luchesku va Manchini o‘rtasidagi farqni sezdingizmi?
- Bir nima deyish qiyin. Men hech qachon murabbiylar haqida gapirmayman. Barchaning o‘z qarashi bor. Manchini va Luchesku - ikki xil murabbiy. Bugungi kunda ular o‘rtasidagi farq - natijada. Hammasi joyida bo‘lsa, murabbiy haq. Bordi-yu, teskari holat kuzatilsa, birinchi o‘rinda murabbiyni ayblashadi. Ularning ishi og‘ir. Hozir jamoamiz yaxshi o‘ynayapti, bir-birimizga moslashyapmiz. Manchini futbolchilarni ko‘p tanqid qilib, har bir o‘yinda yuqori saviyada o‘ynashimiz kerakligini uqtiradi. «Spartak»ka qarshi kechgan uchrashuvdan so‘ng bu boshlanishi ekanligini ta’kidladi. Uning bizdan farqli ravishda, ko‘p narsani o‘z vaqtida ko‘ra olishi yoqadi.
