Oliy liganing 18-turidan o‘rin olgan "Obod" - "Buxoro" (2:3) uchrashuvidan keyin mezbonlar ustozi Andrey Demchenko o‘z fikrlari bilan o‘rtoqlashdi.

"Birinchi bo‘limda futbolchilarim umuman o‘zlariga o‘xshamadi. Xuddi ruhiy tushkunlikka tushib qolgandek to‘p surishdi. Maydonda juda og‘ir o‘ynashdi. Natijada juda oddiy vaziyatlarda xatolarga yo‘l qo‘ydik va ikkita gol o‘tkazib yubordik. Yosh bolalarcha xato qildik, desam mubolag‘a bo‘lmaydi.

Tanaffusda shogirdlarim bilan yaxshilab gaplashib oldim va ikkinchi bo‘limda o‘yinimiz o‘zgardi. Shuning samarasi o‘laroq ikkita gol urdik, afsuski, yana oddiy joy xato qildik va uchinchi gol o‘tkazildi. Vaholanki, durangga erishishga yaqin edik.

O‘tkazib yuborilgan gollarda qaysidir chiziqni alohida aybdor sifatida ko‘rsatish mushkul. Chunki futbolda xatolar zanjir singari bir-biriga bog‘liq bo‘ladi. Darvozabon esa, o‘sha zanjirning oxirgi bo‘lagi hisoblanadi. Avvalgi ikki o‘yinda gol ura olmagandik, bu safar yutqazgan bo‘lsak-da, raqib darvozasini ikki marta ishg‘ol qildik. Jamoa o‘yini o‘syapti, shunchaki, bizga vaqt kerak. Men jamoani to‘g‘ri yo‘lda ketyapti, deb o‘ylayman.

Bugungi raqibning bizdan ustunligi shunda bo‘ldiki, ularda jamoaviy o‘yin yaxshi shakllangan ekan. Bizga shu jihat pand beryapti. Ammo bemalol aytishim mumkin, biz qolgan uchrashuvlarda ham hech kimga sovg‘a bo‘lmaymiz. O‘zbekiston milliy terma jamoasining o‘yinlari sababli, oliy ligada tanaffus yuzaga keladi. O‘sha vaqt biz uchun xizmat qiladi, degan umiddaman. Boisi, davralar oralig‘ida bizda vaqt kam bo‘ldi, o‘sha yetmagan vaqtni sentyabr oyidagi tanaffus orqali to‘ldirishga harakat qilamiz" - dedi Demchenko.