Taniqli jurnalist va sport sharhlovchisi Xayrulla Hamidov televideniyega qaytgani haqida xabar chiqqan edi.
U 19 avgust kuni "Sport" telekanali orqali jonli efirda namoyish etilgan "Yuventus" - "Kalyari" o‘yinini sharhlab bordi.
11 yillik tanaffusdan keyin yana qadrdon joyga qaytish, eski tanishlar va yangi imkoniyatlar haqida sharhlovchining fikrini bilish uchun bog‘landik. X.Hamidov bir muddat gapirolmadi, bo‘g‘ziga nimadir tiqilgandek, bu holatni so‘z bilan ifodalab berolmadi.
– Bilasizmi, uzoq yillik tanaffusdan so‘ng qadrdon joyga qaytish tuyg‘usi menga begona emas. "Sport" telekanaliga o‘yinni sharhlashga chaqirishganida ham yana shunday holatni his qildim. Buni so‘z bilan ifodalab berish qiyin, – dedi X.Hamidov. – Meni kecha "Yuventus" va "Kalyari" o‘yinini sharhlashga chaqirishdi. O‘yin boshida mikrofonni qo‘limga olganimda o‘zimga ham, ko‘zimga ham, so‘zimga ham ishonmadim. 10 daqiqacha nima deyotganimni, ichimdan qanday o‘ylar o‘tayotganini o‘zim bilardim, hech kimga sezdirmadim. So‘ng asta bu olamga, sharhga qaytdim. Futbol muxlislari uchun nimadir yangi gap yo ularni lol qoldiradigan so‘zlardan tiyildim. Boricha, qo‘limdan kelganicha sharhlab berdim.
Xayrulla Hamidov "Sport" telekanalidagi faoliyatini davom ettirishi, u yerdagi rejalari haqida ham alohida to‘xtalib o‘tdi.
– Biz endi shartnoma imzoladik. Hujjatlar tayyor bo‘lsa, yana faoliyatimni davom ettiraman. Muxlislar, o‘zim ham, O‘zbekiston miliy terma jamoamizning g‘alabali onlarini sog‘inganmiz. Vatanimizni jahon chempionatida ko‘rishni istaymiz. MTJ o‘yinlarini sharhlaymanmi yoki yo‘q, buni hozircha bilmayman. Muhimi, O‘zbekistonga birga muxlislik qilamiz.
– Nasib bo‘lsa, kelajakda bir qator rejalar tuzganmiz. "Futbol plyus", "FIFA" yoki shunga o‘xshash ko‘rsatuv bilan ekranlarga ham qaytish niyat bor. Bundan tashqari, shou-dasturlar o‘ylab yuribmiz. Faqat darrov emas, sekin-asta bo‘ladi hammasi.
Biz ham Xayrulla Hamidov ijodi va faoliyatiga omadlar tilab qolamiz.
