Afsonaviy Floyd Meyvezerning promouterlik kompaniyasida faoliyat yuritayotgan yengilmas bokschimiz Sanjarbek Rahmonov navbatdagi jangini AQSHning Nevada shtati Las Vegas shahrida o‘tkazdi.
Sanjarbek Rahmonov professional boksdagi sakkizinchi g‘alabasini qo‘lga kiritdi. 2015 yildan buyon professional ringda sakkizta jang o‘tkazib, yetti g‘alaba va bir durang qayd etgan o‘zbek bokschisi bu gal amerikalik Noe Lopez bilan raqobatlashadi.
Noe bungacha yettita jang o‘tkazib, oltitasida g‘alaba qozongan va bir marta durang natija qayd etgan edi. Sakkiz raundga mo‘ljallangan jang oxiriga yetmadi va raqibini kuchli zarba bilan sof nokautga tushirgan Sanjarbek Rahmonov navbatdagi g‘alabasini nishonladi.
Ma’lumot uchun, Rahmonov shu kungacha 9 ta jang o‘tkazgan bo‘lib, ularning 8 tasida g‘alabaga erishgan. To‘rtta jangda raqiblarini nokautga uchratgan. Hisobida bitta durang bor.
