2014 yili Madridning "Real" jamoasi Garet Beylni, Kataloniyaning "Barselona" klubi esa Neymarni fantastik narxlarga sotib olishgan edi. O‘shanda ko‘pchilik bu ikki futbolchi Ronaldu va Messini o‘rnini egallashini kutgan edi. Biroq unday bo‘lmadi. Xo‘sh mazkur qarama-qarshilik 4 yil davomida qanday natijalarga erishdi? Quyida bu haqda to‘xtalib o‘tamiz.
O‘yinlar va gollar
Beyl: 153 o‘yin - 68 gol
Neymar: 186 o‘yin - 105 gol
Beyl "Real"ga kelganidan buyon shu qadar ko‘p jarohat oldiki, buni u hayoliga ham keltirmagan bo‘lsa kerak. Uelslik futbolchi jamoaga kelganidan buyon 153 ta uchrashuvda maydonga tushib, o‘z hisobiga 68 ta gol yozdirib qo‘yishga muvaffaq bo‘ldi. Neymar esa 186 o‘yinda ishtirok etib, 105 marta raqiblar posbonlarini ranjitgan. Bundan ko‘rinib turibdiki braziliyalik hujumchi uelslik hamkasbidan bu borada ancha yaxshi natijani qayd etgan.
Jamoaviy sovrinlar
Beyl: 10 ta
Neymar: 8 ta
Beyl 2014 yildan buyon "Real" bilan uch martadan Chempionlar ligasi va UYEFA superkubogida zafar quchib, ikki bora klublar o‘rtaisdagi jahon chempionatida g‘olib chiqdi. Shuningdek bu yil u ana shu sovrinlari qatoriga Ispaniya chempionligi va superkubogini qo‘shib qo‘ydi. Uelslik futbolchi 4 ta mavsumda 10 ta sovrin qo‘lga kiritdi. Neymar esa 2 marta Ispaniya chempioni, 3 bora Ispaniya kubogi g‘olibi bo‘lib, bir martadan Ispaniya superkubogi, Chempionlar ligasi va klublar o‘rtasidagi mundialda g‘oliblik nashidasini surdi. Demak, jamoaviy sovrinlar bobida ustunlik Beyl tomonida.
Shaxsiy sovrinlar
Beyl: 3
Neymar: 3
Beyl 3 marta UYElsning eng yaxshi futbolchisi sifatida e’tirof etilishida, "Real"da ko‘rsatgan o‘yinlari sabab bo‘lgani hech kimga sir emas. Shunindek u Yevropaning eng yaxshi futbolchilari uchligiga kirishga ham erishdi. Neymar ikki marta Yevropadagi eng yaxshi braziliyalik futbolchi nomiga sazovor bo‘lgan bo‘lsa, 2015 yili Messi va Ronaldu bilan bir qatorda Chempionlar ligasining eng sermahsul futbolchisiga aylandi. Shaxsiy sovrinlar bobida tenglik!
