Milliy terma jamoamiz Xitoyga qarshi o‘ynaydi. Biz Rossiyada bo‘lib o‘tadigan jahon chempionatiga chiqish yo‘lida muhim qadam tashlaymiz yoki aksi. Ishqilib, aksi bo‘lmasin.
TURING, VAQT KETYAPTI, VAQT!
Hademay o‘yin boshlanadi. Turinglar endi, futbolchilar. Oldingizda sizni muhim o‘yin kutib turibdi. Ayniqsa, bu gap ko‘proq darvozabonimiz Aleksandr Lobanovga tegishli. Hurmatli Lobanov, bugun sizdan o‘zgacha o‘yin kutamiz. Bilamiz, baribir, Babayan sizni asosiy tarkibda maydonga tushiradi. Shu bois Xitoyga qarshi o‘yinda, aslida, boshqacha ekanligingizni isbotlang. Muxlislar yanglishganini, siz juda jon kuydirib harakat qilishingizni ko‘rsating. Ortiqcha vazndan xalos bo‘lganingizni, endi bu yog‘iga xuddi sportchilar baland-baland sakragandek sakray olishingizni isbotlang. Aytganday, esingizdami, Janubiy Koreya birinchi o‘yinda sizning ortiqcha vazningiz tufayli gol urgandi. Bu safar xitoyliklar ham xuddi shunga urinishlari tayin. Endi yeng shimaring, ko‘rsatib qo‘ying bu safar ular chuchvarani xom sanaganliklarini. Shunchalik baland sakrangki, havodan kelayotgan to‘plarda raqibning kerak bo‘lsa 3 metrlik futbolchisi ham hech narsa qila olmasin. Qolaversa, jarima zarbalariyu penaltilarni qaytarishning ham hadisini olganingizni ko‘rsating. Chunki Samvel Babayanning bir qo‘pol himoyachisi bor asosiy tarkibda tushadigan, o‘sha raqibni yiqitib, penaltiga sabab bo‘lishi mumkin. Har holda, oldindan hech narsa deb bo‘lmaydi-da.
BIRORTA XITOYLIKNI O‘TKAZMANG!
