Boks bo‘yicha jahon chempionatida uchinchi bokschimiz yarim final yo‘llanmasini qo‘lga kiritdi. 91 kg. vazndagi Sanjar Tursunov chorak final bosqichida niderlandiyalik Roy Korvingga qarshi chiroyli jang o‘tkazdi.
Raqib sportchisi bo‘y jihatdan ustunlikka ega bo‘lganiga qaramay, hamyurtimiz taktik jihatdan yaxshi jang olib bordi va aniq zarbalar evaziga kerak ochkolarni qo‘lga kiritdi. Natijada hakamlarning 4 nafari g‘alabani Tursunovga taqdim etgan bo‘lsa, bir nafari Korvingni ustun sanadi — 30:27, 30:27, 30:27, 30:27, 27:30.
Delegasiyamiz tarkibidagi eng yosh bokschi hisoblangan Sanjar Tursunov faoliyatida ilk marta jahon chempionatida ishtirok etayotganiga qaramay, 3ta jangda g‘alaba qozonib, eng kamida bronza medal masalasini hal qilib qo‘ydi. Hamyurtimiz yarim finalda qozog‘istonlik Vasiliy Levitga qarshi ringga ko‘tariladi.
Bugun kechki dasturda yana 5 nafar bokschimiz yarim final yo‘llanmasi uchun jang olib borishini eslatib o‘tamiz.