Germaniyada o‘tayotgan boks bo‘yicha jahon chempionatida o‘zbekistonlik sportchi asosiy raqib hisoblangan qozog‘istonlik bokschini musobaqadan chiqarib yuborishga muvaffaq bo‘ldi.

Bektemir Meliqo‘ziyev va Yerik Aljanov Toshkentda o‘tgan Osiyo chempionatining finalida ham to‘qnash kelishgandi. O‘shanda hamyurtimiz yaqqol ustunlik bilan qozoq bokschisini mag‘lubiyatga uchratgandi. Bu jang o‘sha to‘qnashuv ssenariysining takrori bo‘ldi. Aljanov ikki raund davomida tengma-teng jang qilishga urindi, ammo Bektemir uchinchi raundda juda ko‘plab zarbalar bilan raqibni ancha qiyin ahvolga solib qo‘ydi. Aynan shu sababli bo‘lsa kerak, hakamlar g‘alabani Meliqo‘ziyevga tortiq etishdi — 3:2 (30:27, 29:28, 29:28, 28:29, 28:29).

Shu tariqa, O‘zbekiston delegasiyasining oltinchi bokschisi yarim final yo‘llanmasini qo‘lga kiritdi.