Toshkentdagi Radisson Blu mehmonxonasida «O‘zbekistonda sport tashkilotlarini boshqarish va jahon tajribasi» mavzusida konferensiya bo‘lib o‘tdi.
Mazkur konferensiya O‘zbekiston futbol federasiyasi prezidentligi sayloviga 5 kun vaqt qolganida tashkil etildi.
Tadbirning asosiy mehmoni sifatida o‘z vaqtida Rossiya futbol uyushmasi prezidentligi uchun nomzod bo‘lgan Alisher Aminov taklif etilgandi. Aminov yuqoridagi mavzu bo‘yicha prezentasiya qilib, mavjud muammo va kamchiliklarni ochiqcha sanab o‘tdi. Bunda mutaxassis MDH tararrufiga kiruvchi bir qator mamlakatlarni, xususan, Rossiya futbolini ham misol qilib keltirib, ularni futboli rivojlangan mamlakatlar bilan solishtirdi.
Alisher Aminov Toshkentga Rossiyadagi futbolchi va murabbiylar huquqlarini himoya qilishi ko‘zda tutilgan uyushma asoschilaridan biri Vladimir Leonchenko bilan tashrif buyurdi. Mehmon ham bunda o‘z tajribasi bilan o‘rtoqlashib, O‘zbekiston futbolidagi muammolarga til tekkazib o‘tdi.
Konferensiyada, shuningdek, sport qo‘mitasi matbuot xizmati rahbari Mirzahakim To‘xtamirzayev va O‘zbekiston davlat jismoniy tarbiya instituti kafedra mudiri Komil Ziyodullayev prezentasiyalari bilan ishtirok etdi.
Unda OAV xodimlari, futbolchilar, futbol faxriylari va mutaxassislar ham qatnashdi. Keyinroq debatga aylanib ketgan yig‘ilishda O‘FFning ayni vaqtdagi rahbariyatiga shaffoflik yetishmasligi va barcha ishlar eshik orqasida hal etilishi masalasi ko‘rib chiqildi. Alisher Aminovning qayd etishicha, mamlakat futbolining oldida ayni paytda ikki yo‘l turibdi: yo shaffof ishlaydigan va futbolni fan darajasida tushunadigan mutaxassislar bilan to‘g‘ri yo‘lga tushib olish yoki hozirgacha kelingan yo‘ldan yurishda davom etib, rivojlangan mamlakatlardan ortda qolaverish.
Mazkur konferensiya «Anhor.uz» internet sayti bilan hamkorlikda amalga oshirildi.
Alisher Aminov o‘zbek bo‘lsa-da, Rossiya fuqaroligiga ega shaxs. U avval O‘FF ishini ko‘klarga ko‘tarib maqtagan, sal o‘tgach esa tanqidiy va ba’zan asossiz gaplarni tinmasdan aytib kelgan edi.
Uning bu harakatlaridan O‘FF rahbarligini qo‘lga kiritish niyati borligini sezish mumkin. Bu insonni o‘zbek futboliga qanchalik foydasi tegishi mumkin, bilmadik...
