Oliy liganing 21-turidan o‘rin olgan "Bunyodkor" - "Neftchi" (2:0) uchrashuvidan keyin, "qaldirg‘ochlar" ustozi Mirjalol Qosimov o‘z fikrlarini aytdi.

"Muhim uch ochkoga ega bo‘ldik. O‘yin biz istagandek bo‘ldi. Uchrashuvda to‘liq ustunlikka erishdik va butun o‘yin davomida "Neftchi"ga imkoniyat qoldirmadik. To‘p bilan muomala qilishda ham, o‘yinni nazorat qilish bo‘yicha ham raqibdan yaxshi o‘ynadik.

Vohid Shodiyev? Bu transferga har xil qarash mumkin. Shodiyev jarohati tufayli bir yilcha futbol o‘ynagani yo‘q. Keyin bir yilga yaqin gol ham urmadi. Shodiyevni qariya deyapmiz, lekin bunga qo‘shilmayman. Vohid hozir 30 yoshda, ayni gullagan davrida. Hozir hujumchi gollar urishi, maydonda uchib yurishi lozim. Har gal Shodiyevga maydonga tushgandan keyin katta ishtiyoq bilan o‘ynash kerakligini ta’kidlayapman. Uning o‘rniga maydonga tushib o‘ynab berolmayman. O‘ylaymanki, Shodiyev o‘yindan-o‘yinga kuchayib boradi va o‘zining sport formasini tiklaydi. Gol urishni ham boshlab oldi.

Shohruz Norxonovga keladigan bo‘lsak, barchaga imkoniyat beramiz. Norxonov "Obod"da yaxshi o‘ynagan, ammo "Bunyodkor" bilan "Obod"ni farqi bor. Nurmatov, Shodiyev, Norxonov, Chemirtan kabi hujumchilarimiz bor. Barchaga imkoniyat beramiz. Qolgani futbolchining o‘ziga bog‘liq.

"Qizilqum" bilan o‘yinda biz o‘z aybimiz tufayli ikki ochko yo‘qotdik. Tasodif evaziga Navoiyda g‘alaba qozona olmadik. Futbolni 90 daqiqa o‘ynaladi. Buni har doim futbolchilarga ta’kidlayman" - dedi Qosimov.