Олий лиганинг 21-туридан ўрин олган "Бунёдкор" - "Нефтчи" (2:0) учрашувидан кейин, "қалдирғочлар" устози Миржалол Қосимов ўз фикрларини айтди.
"Муҳим уч очкога эга бўлдик. Ўйин биз истагандек бўлди. Учрашувда тўлиқ устунликка эришдик ва бутун ўйин давомида "Нефтчи"га имконият қолдирмадик. Тўп билан муомала қилишда ҳам, ўйинни назорат қилиш бўйича ҳам рақибдан яхши ўйнадик.
Воҳид Шодиев? Бу трансферга ҳар хил қараш мумкин. Шодиев жароҳати туфайли бир йилча футбол ўйнагани йўқ. Кейин бир йилга яқин гол ҳам урмади. Шодиевни қария деяпмиз, лекин бунга қўшилмайман. Воҳид ҳозир 30 ёшда, айни гуллаган даврида. Ҳозир ҳужумчи голлар уриши, майдонда учиб юриши лозим. Ҳар гал Шодиевга майдонга тушгандан кейин катта иштиёқ билан ўйнаш кераклигини таъкидлаяпман. Унинг ўрнига майдонга тушиб ўйнаб беролмайман. Ўйлайманки, Шодиев ўйиндан-ўйинга кучайиб боради ва ўзининг спорт формасини тиклайди. Гол уришни ҳам бошлаб олди.
Шоҳруз Норхоновга келадиган бўлсак, барчага имконият берамиз. Норхонов "Обод"да яхши ўйнаган, аммо "Бунёдкор" билан "Обод"ни фарқи бор. Нурматов, Шодиев, Норхонов, Чемиртан каби ҳужумчиларимиз бор. Барчага имконият берамиз. Қолгани футболчининг ўзига боғлиқ.
"Қизилқум" билан ўйинда биз ўз айбимиз туфайли икки очко йўқотдик. Тасодиф эвазига Навоийда ғалаба қозона олмадик. Футболни 90 дақиқа ўйналади. Буни ҳар доим футболчиларга таъкидлайман" - деди Қосимов.
