Ertaga, 17 sentyabr kuni Ashxoboddagi Olimpiya stadionida Jang san’ati va yopiq inshootlardagi V Osiyo o‘yinlarining tantanali ochilish marosimi bo‘lib o‘tadi. Xabar berib o‘tganimizdek, kecha delegasiyamizning asosiy qismi Toshkent-Ashxobod charter reysi bilan Turkmaniston poytaxtiga yetib borib, Olimpiya shaharchasiga joylashgan edi. Kechqurun shu yerning o‘zida O‘zbekiston davlat bayrog‘ini ko‘tarish tantanali marosimi o‘tkazildi.

Marosimda O‘zbekiston Respublikasining Turkmanistondagi Favqulodda va Muxtor elchisi Akmaljon Kuchkarov, O‘zbekiston Respublikasi Jismoniy tarbiya va sport davlat qo‘mitasining raisi Rustam Qurbonov, O‘zbekiston Milliy olimpiya qo‘mitasi Bosh kotibi Oybek Kasimov, musobaqa tashkiliy qo‘mitasi vakillari, sportchilar, murabbiylar va ommaviy axborot vositasi xodimlari ishtirok etishdi.

Bayroq ko‘tarish marosimida barcha delegasiya a’zolari ishtirok etib, madhiyamiz sadolari ostida O‘zbekiston Davlat bayrog‘i rasman tantanali ravishda ko‘tarildi.

Shundan so‘ng Olimpiya shaharchasi meri, Turkmaniston kurashi bo‘yicha 2 karra xalqaro turnirlar sovrindori Dayanch Guldurdiyev Osiyo o‘yinlarida delegasiyamiz rahbari, O‘zbekiston Respublikasi Jismoniy tarbiya va sport davlat qo‘mitasi raisi o‘rinbosari Farxod Turdiyev bilan o‘zaro sovg‘alar almashib olishdi.

Demak, musobaqada ishtirok etuvchi 64 mamlakat bayroqlari orasida kechadan boshlab muzaffar bayrog‘imiz ham xilpiray boshladi. Ayni paytda barcha sportchilarimizning kayfiyati baland, ular ko‘tarinki ruh va katta ishonch bilan musobaqalarga tayyorgarlik ko‘rmoqdalar.

Bugundan jiu jitsu va an’anaviy kurash bo‘yicha bellashuvlar boshlandi. Ularda o‘zbekistonlik sportchilar ham g‘oliblik uchun kurash olib borishmoqda. Qayd etilgan natijalar bilan keyingi chiqishlarimizda batafsil ma’lumot beramiz.