Эртага, 17 сентябрь куни Ашхободдаги Олимпия стадионида Жанг санъати ва ёпиқ иншоотлардаги V Осиё ўйинларининг тантанали очилиш маросими бўлиб ўтади. Хабар бериб ўтганимиздек, кеча делегациямизнинг асосий қисми Тошкент-Ашхобод чартер рейси билан Туркманистон пойтахтига етиб бориб, Олимпия шаҳарчасига жойлашган эди. Кечқурун шу ернинг ўзида Ўзбекистон давлат байроғини кўтариш тантанали маросими ўтказилди.
Маросимда Ўзбекистон Республикасининг Туркманистондаги Фавқулодда ва Мухтор элчиси Акмалжон Кучкаров, Ўзбекистон Республикаси Жисмоний тарбия ва спорт давлат қўмитасининг раиси Рустам Қурбонов, Ўзбекистон Миллий олимпия қўмитаси Бош котиби Ойбек Касимов, мусобақа ташкилий қўмитаси вакиллари, спортчилар, мураббийлар ва оммавий ахборот воситаси ходимлари иштирок этишди.
Байроқ кўтариш маросимида барча делегация аъзолари иштирок этиб, мадҳиямиз садолари остида Ўзбекистон Давлат байроғи расман тантанали равишда кўтарилди.
Шундан сўнг Олимпия шаҳарчаси мэри, Туркманистон кураши бўйича 2 карра халқаро турнирлар совриндори Даянч Гулдурдиев Осиё ўйинларида делегациямиз раҳбари, Ўзбекистон Республикаси Жисмоний тарбия ва спорт давлат қўмитаси раиси ўринбосари Фарход Турдиев билан ўзаро совғалар алмашиб олишди.
Демак, мусобақада иштирок этувчи 64 мамлакат байроқлари орасида кечадан бошлаб музаффар байроғимиз ҳам хилпирай бошлади. Айни пайтда барча спортчиларимизнинг кайфияти баланд, улар кўтаринки руҳ ва катта ишонч билан мусобақаларга тайёргарлик кўрмоқдалар.
Бугундан жиу житсу ва анъанавий кураш бўйича беллашувлар бошланди. Уларда ўзбекистонлик спортчилар ҳам ғолиблик учун кураш олиб боришмоқда. Қайд этилган натижалар билан кейинги чиқишларимизда батафсил маълумот берамиз.
