Ispaniyaning “Real” klubi yarim himoyachisi Toni Kroos o‘z muxlislardan futbolchilarga nisbatan hushtakbozlik qilmasliklarini so‘radi.
 
Yevropa Chempionlar ligasi 1-turidan o‘rin olgan APOEL klubiga qarshi kechgan bahs (3:0) da “Santyago Bernabeu” “Real” yarim himoyachisi Garet Beylni muvaffaqiyatsiz harakatlari uchun hushtakbozlik bilan siylagan.
 
“...Men o‘zim hech narsani eshitmadim va tribunada nima bo‘lganidan xabarim yo‘q. Ammo nima bo‘lgan taqdirda ham o‘zimizning futbolchilarga nisbatan hushtakbozlik qilish yaxshi emas.
 
Biz g‘alaba qozonish uchun bor kuchimizni berdik va hech qaysimiz ustimizdan hushtakbozlik qilishlariga arzimaymiz!
 
Biroq gap “Real” haqida bormoqda va muxlislar ham har bir futbolchi ijrosida kuchli o‘yin ko‘rishni xohlaydi.
 
To‘g‘ri, ba’zilar bizga qarshi shunday munosabatda bo‘lishi mumkin, lekin bu hech nimaga yordam bermaydi”, deydi germaniyalik futbolchi Toni Kroos.
 
Ta’kidlash joizki, Garet Beyl APOELga qarshi uchrashuvning 82-daqiqasiga qadar maydonda harakat qildi va gollarning birida jamoadoshlarini to‘p bilan ta’minladi. Ammo shunga qaramasdan muxlislar Garet Beyl ustidan mazah qilishgan...
 
Ma’lumot uchun, “Real” klubi Yevropa Chempionlar ligasining birinchi turini o‘z maydonida o‘tkazib, yirik hisobda g‘alaba qozondi. Endilikda “qirollik klubi” 2-turni 26 sentyabr kuni Germaniyaning “Borussiya” Dortmund klubiga qarshi o‘tkazadi.