«Real» bosh murabbiyi Zayniddin Zidan Ispaniya chempionati doirasida bo‘lib o‘tgan «Betis»ga qarshi o‘yin (0:1) borasida o‘z fikrlarini bildirib o‘tdi.

«To‘p raqib darvozasiga kirishni istamagani — yomon, ammo bu futbol, shunaqasi ham bo‘lib turadi. Biz ajoyib o‘yin ko‘rsatdik, deya olmayman, ammo yomon o‘ynadik, deyishga ham til bormaydi. Biz ikkinchi bo‘limning dastlabki daqiqalarini yaxshi o‘tkazdik, ammo keyinchalik shosha boshladik.

Bizda 26 yoki 27ta golli vaziyat bo‘ldi, ammo o‘z stadionimizda omadimiz kelmadi. Menga «xotirjamlik» so‘zi yoqadi. Biz uni saqlab qolishimiz kerak. Biz xotirjam bo‘lamiz.

Chempionatning starti haqida to‘xtaladigan bo‘lsam, buni qabul qilishga majburmiz. O‘z uyimizda yetarlicha yaxshi o‘ynay olmayapmiz. Bunday bo‘ladi, deb o‘ylamagandik. Endi hech narsani o‘zgartira olmaymiz. Lekin keyingi o‘yindan boshlab vaziyatni o‘zgartirishga harakat qilamiz. G‘alaba qozonish uchun bor kuchimizni beramiz. Shuningdek, o‘z uyimizda o‘tkazadigan keyingi o‘yinda ham g‘alaba qozonishga intilamiz.

Ronalduning o‘yiniga nisbatan e’tirozim yo‘q. Aksincha, diskvalifikasiyadan keyin safimizga qaytganidan xursandmiz.

Men hech narsadan afsuslanmayman, men hamisha g‘alaba qozonishni istayman. Futbolchilarchilarni turlicha almashtirishim mumkin, ammo maqsad o‘zgarmas bo‘lib qoladi — g‘alaba», — dedi Zidan.