«Реал» бош мураббийи Зайниддин Зидан Испания чемпионати доирасида бўлиб ўтган «Бетис»га қарши ўйин (0:1) борасида ўз фикрларини билдириб ўтди.

«Тўп рақиб дарвозасига киришни истамагани — ёмон, аммо бу футбол, шунақаси ҳам бўлиб туради. Биз ажойиб ўйин кўрсатдик, дея олмайман, аммо ёмон ўйнадик, дейишга ҳам тил бормайди. Биз иккинчи бўлимнинг дастлабки дақиқаларини яхши ўтказдик, аммо кейинчалик шоша бошладик.

Бизда 26 ёки 27та голли вазият бўлди, аммо ўз стадионимизда омадимиз келмади. Менга «хотиржамлик» сўзи ёқади. Биз уни сақлаб қолишимиз керак. Биз хотиржам бўламиз.

Чемпионатнинг старти ҳақида тўхталадиган бўлсам, буни қабул қилишга мажбурмиз. Ўз уйимизда етарлича яхши ўйнай олмаяпмиз. Бундай бўлади, деб ўйламагандик. Энди ҳеч нарсани ўзгартира олмаймиз. Лекин кейинги ўйиндан бошлаб вазиятни ўзгартиришга ҳаракат қиламиз. Ғалаба қозониш учун бор кучимизни берамиз. Шунингдек, ўз уйимизда ўтказадиган кейинги ўйинда ҳам ғалаба қозонишга интиламиз.

Роналдунинг ўйинига нисбатан эътирозим йўқ. Аксинча, дисквалификациядан кейин сафимизга қайтганидан хурсандмиз.

Мен ҳеч нарсадан афсусланмайман, мен ҳамиша ғалаба қозонишни истайман. Футболчиларчиларни турлича алмаштиришим мумкин, аммо мақсад ўзгармас бўлиб қолади — ғалаба», — деди Зидан.