Professional boksda faoliyatini boshlagan Fazliddin G‘oibnazarov bugun o‘zining navbatdagi jangini o‘tkazdi. U AQSHning Arizona shtati Tuson shahrida faoliyatidagi uchinchi jangida ringga chiqdi.

Raqibi meksikalik Viktor Rosas bo‘lib, sakkiz raundga belgilangan jang ochkolar hisobiga ko‘ra aniqlandi. Toni Zayno hakamlik qilgan jangda bokschimiz ochkolar hisobi bo‘yicha raqibini mag‘lubiyatga uchratdi. Kris Uilson, Dennis O`Konnel va Rubin Rokki Teylor bir xil 80:72, 80:72, 80:72 hisobida g‘alabani G‘oibnazarovga taqdim etishdi.

Ma’lumot uchun, 10 oktyabr kuni 30 yoshga to‘ladigan Rosas profi ringda bugungisi bilan hisoblaganda 16 ta jang o‘tkazgan bo‘lib, ularning 9 tasida g‘alabaga erishgan. Uchta jangini nokaut bilan yakunlagan. Mag‘lubiyatlari soni 7 ta bo‘ldi.

Eslatib o‘tish kerak, Fazliddin G‘oibnazarov mashhur promouter Bob Arumga tegishli Top Rank promouterlik kompaniyasi bayrog‘i ostida o‘z janglarini o‘tkazib kelyapti. Bugun Fazliddin uchinchi g‘alabasini nishonladi.